IIB bola o‘g‘irlangani haqdagi videoga izoh berdi: "Samarqandda bola emas, uning qulog‘idagi sirg‘a o‘g‘irlangan, jinoyatchi ayol ushlangan"

Ijtimoiy tarmoqlarda "Bola o‘g‘rilari paydo bo‘lgani aytilmoqda, qizaloqni oldiga kelib uni aldab olib ketishdi" sarlavhasi ostida video tarqaldi.

Holat viloyat IIB tomonidan o‘rganildi.

Aniqlanishicha, 26 aprel kuni Samarqand tumani “Obod” mahallasida yashovchi fuqaro tuman IIBga ariza bilan murojaat qilib, Samarqand tumani “Qo‘shko‘prik” mahallasi hududida 2013 yilda tug‘ilgan qizining voyaga yetmaganligidan foydalanib unga bildirmasdan qulog‘idagi tilla sirg‘asini noma’lum shaxs o‘g‘irlab ketganligini bildirgan.

Tuman IIB xodimlari tomonidan olib borilgan tezkor tadbirlar natijasida ushbu jinoyatni 1997 yilda tug‘ilgan S.M. sodir etganligi aniqlanib, qo‘lga olingan.

Mazkur holat yuzasidan Samarqand tumani IIB huzuridagi tergov bo‘limi tomonidan S.M.ga nisbatan O‘zbekiston Respublikasi JKning 169-moddasi 1-qismi bilan jinoyat ishi qo‘zg‘atilgan.