Ishtixonda ayolni do‘pposlagan ona va o‘g‘ilga nisbatan jinoyat ishi ochildi
Ijtimoiy tarmoqlarda ona va o‘g‘il bir ayolni do‘pposlayotgani aks etgan video tarqaldi.
Samarqand viloyati IIB axborot xizmati holat yuzasidan ma’lumot berdi.
Ma’lum qilinishicha, holat joriy yilning 13 iyun kuni Ishtixon tumanining “Orlot” mahalla fuqarolar yig‘ini hududidagi fermer xo‘jaliklarining birida sodir bo‘lgan.
Ushbu fermer xo‘jaligidagi yer maydonidan ijarachi sifatida foydalanib kelayotgan ayollar o‘rtasida o‘zaro yuzaga kelgan kelishmovchilik oqibatida janjal sodir bo‘lgan.
Janjalga ijarachilardan birining o‘g‘li aralashib, ikkinchi ijarachiga tan jarohati yetkazgan.
Holat yuzasidan Jinoyat kodeksining 277-moddasi (bezorilik) 2-qismi bilan jinoyat ishi qo‘zg‘atilib, tergov harakatlari olib borilmoqda.
