Isroil Madrimovda g‘alaba, Murodjon Ahmadaliyev esa mag‘lub bo‘ldi
Isroil Madrimov va Murodjon Ahmadaliyev Amerika Qo‘shma Shtatlarining San-Antonio shahrida professional boksdagi navbatdagi jangini o‘tkazdi.
Unda super yarimo‘rta vazn toifasida o‘zbekistonlik professional bokschi Isroil Madrimov (9-0-1) o‘zi uchun yangi — o‘rta vazn toifasida ringga ko‘tarildi. Unga amerikalik Rafael Igbokve (16-4) raqiblik qildi.
10 raundga mo‘ljallangan jang to‘liq davom etdi va unda hakamlar qarori bilan (100-90, 99-91, 99-91) hamyurtimiz g‘alaba qozondi.
Bu Isroil Madrimov uchun professional faoliyatidagi to‘qqizinchi g‘alaba bo‘ldi.
Ikkinchi yengil vazn toifasida WBA va IBF chempionlik kamarlari sohibi, o‘zbekistonlik professional bokschi Murodjon Ahmadaliyevga esa filippinlik Marlon Tapales raqiblik qildi.
12 raundga mo‘ljallangan jang to‘liq davom etdi, afsuski, hakamlar qarori bilan filippinlik bokschi g‘alaba qozondi.
Bu Murodjon Ahmadaliyev uchun to‘rtinchi himoya jangi edi. Endilikda filippinlik Marlon Tapales katta ehtimol bilan mutlaq chempionlik uchun Stiven Fulton — Naoya Inoue jangi g‘olibiga qarshi ringga chiqadi.
