Millat taqdiriga daxldor hikmatlar

O‘zbekiston Respublikasining Birinchi Prezidenti Islom Karimov o‘zining boy ma’naviy merosi, chuqur falsafiy qarashlari va hayotiy hikmatlari bilan xalqimiz tafakkurida o‘chmas iz qoldirgan buyuk davlat arbobidir.      

U zotning millat, mustaqillik, ma’naviyat, ta’lim-tarbiya, ilm-fan va jamiyat taraqqiyoti haqidagi fikrlari bugun ham o‘z ahamiyatini yo‘qotgani yo‘q. Biz Islom Karimovning “O‘zbekiston XXI asr bo‘sag‘asida: xavfsizlikka tahdid, barqarorlik shartlari va taraqqiyot kafolatlari”, “Tarixiy xotirasiz kelajak yo‘q”, “Milliy istiqlol mafkurasi – xalq e’tiqodi va buyuk kelajakka ishonchdir”, “Yuksak ma’naviyat – yengilmas kuch” asarlarini varaqlab, ular orasidan millat taqdiriga daxldor eng muhim g‘oyalar mujassamlashgan iboralarni saraladik.

***

- Ona tili – bu millatning ruhidir.

- Kimki millatni o‘ziga qaram qilmoqchi bo‘lsa, avvalo uning madaniyatiga chang soladi.

- Milliy mafkura millatni birlashtiruvchi bayroqdir.

- Milliy ongi, iftixori baland millatni yengib bo‘lmaydi.

- O‘z tarixi va ajdodlarini siylagan xalqning kelajagi, albatta, porloq bo‘ladi.

- O‘z tarixini bilmaydigan, kechagi kunini unutgan millatning kelajagi yo‘q.

- Xalq nazaridan qolish, agar jindek vijdoni bo‘lsa, o‘lim bilan barobardir.

- Xalqning birligi, jipsligi, tinch-totuvligi bizning bebaho boyligimizdir.

- Xalqning baxt-saodati yo‘lida, farovon kelajak yo‘lida har qancha mehnat qilsak, zahmat cheksak arziydi.

- Ma’naviyatga tahdid – o‘zligimiz va kelajagimizga tahdid.

- Ma’naviyatni tushunish, anglash uchun avvalo insonni tushunish, anglash kerak.

- Aqliy zakovat va ruhiy-ma’naviy salohiyat ma’rifatli insonning ikki qanotidir.

- Ma’naviyat insonga ona suti, ota namunasi, ajdodlar o‘giti bilan singadi.

- Inson dunyoga yaxshi ish qilish, yaxshi iz qoldirish uchun keladi.

- Beparvo odam dushmandan ham xavfliroqdir.

- Ta’limni tarbiyadan, tarbiyani esa ta’limdan ajratib bo‘lmaydi - bu sharqona qarash, sharqona hayot falsafasi.

- Biz tarbiya haqida o‘ylar ekanmiz, yoshlarning keksalarga hurmati yuksak bo‘lish tamoyilini yo‘qotmaylik.

- Tariximizdagi og‘riqli davrlardan ham xulosa chiqarib yashashimiz zarur.

- Tarixiy xotirasiz – kelajak yo‘q.

- Bu yorug‘ dunyoda hayot bor ekan, oila bor. Oila bor ekan, farzand deb atalmish ne’mat bor. Farzand bor ekan, odamzod hamisha ezgu orzu va intilishar bilan yashaydi.

- Farzandlarimiz bizdan ko‘ra bilimli, kuchli, dono va albatta baxtli bo‘lishlari shart.

- Mehr-oqibat, muruvvat bo‘lmagan jamiyat halokatga mahkumdir.

- Kelajak bugundan boshlanadi.

- Jamiyatning haqiqiy boyligi - bu inson, inson avlodidir.

- Ma’naviyatga qarshi qaratilgan har qanday tahdid o‘z-o‘zidan mamlakat xavfsizligini, uning milliy manfaatlarini, sog‘lom avlod kelajagini ta’minlash yo‘lidagi jiddiy xatarlardan biriga aylanishi va oxir oqibatda jamiyatni inqirozga olib kelishi mumkin.

- Davlat o‘z fuqarolarini muhofaza qilishga qodir bo‘lsagina davlat bo‘ladi.

- Demokratik jamiyatda bolalar, umuman, har bir inson erkin fikrlaydigan etib tarbiyalanadi.

- Hammamizga ayon bo‘lish kerakki, oila sog‘lom ekan-jamiyat mustahkam, jamiyat mustahkam ekan mamlakat barqarordir.

- Aravani otdan oldin qo‘yib bo‘lmaganidek, siyosatni ham iqtisoddan oldinga qo‘yib bo‘lmaydi.

- Huquqiy davlatning quroli ham, himoyasi ham, ko‘zi ham, so‘zi ham qonundir.

- Har qanday jamoani, har qaysi jamiyatni, har qanday muhitni, avvalambor ayollarimiz obod etadi.

- Ba’zan bittagina ilmiy kashfiyot mamlakatni butun dunyoga mashhur qilishi mumkin.

- O‘z qobig‘iga o‘ralashib qolish ilm-fanda yo‘l qo‘yib bo‘lmaydigan holdir.

- Ilm - ziyo salohiyati - bu xalqning, vatanning ulkan boyligi, kelajak poydevoridir.

- Ilm-u tafakkur – kishini ezgulikka boshlaydigan beqiyos kuch.

- Ilm-ma’rifatga qiziqishi sust mamlakatning kelajagi ham bo‘lmaydi.

- Ilm va tafakkur odamlar qalbiga nur, ongiga ziyo, xonadoniga fayz-baraka keltiradigan buyuk mo‘’jizadir.

- Fan ravnaqisiz buyuk davlat qurib bo‘lmaydi.

- Sharqning ming yillik falsafasi-yu, islom qadriyatlari taraqqiyot uchun bebaho xazinadir.

- Ilmga, ijodga, kashf etishga intilish - bu oliyjanob intilishdir.

Shahobiddin Ashurov,

Nigorabonu Suvonova,

Samarqand davlat chet tillar instituti professorlari.