Qozog‘istonda pasporti olib qo‘yilgan o‘zbekistonlik eru xotinga yordam ko‘rsatildi
Ijtimoiy tarmoqlarda O‘zbekiston fuqarosi o‘tgan yilning noyabridan buyon Qozog‘istonda bir ish beruvchining qo‘lidan boshqasiga o‘tkazilayotgani, homilador ayolini pasportsiz vatanga jo‘nata olmayotgani haqida xabarlar tarqalgan edi.
Ushbu holat yuzasidan mamlakatimizning Qozog‘istondagi elchixonasi hamda Tashqi mehnat migratsiyasi agentligi xodimlari hamkorlikda o‘rganish olib bordi. Haqiqatan ham qozog‘istonlik ish beruvchi tomonidan B.Saiboyev va uning xotinining pasporti olib qo‘yilganligi aniqlangan.
Qozog‘istonlik ish beruvchi va mas’ul tashkilotlar bilan tegishli muzokaralar olib borilib, ushbu vatandoshlarimizning pasportlarini olib berishga erishildi.
Tashqi mehnat migratsiyasi agentligi xabariga ko‘ra, bugungi kunda B.Saiboyev Turkiston shahrida vaqtincha mehnat faoliyatini amalga oshirmoqda. Uning ayoli O‘zbekistonga qaytarildi.
