Sport xabarlari
Tog‘ velosipedi
Samarqand shahridagi "Afrosiyob" tepaligida o‘smirlar va yoshlar, erkaklar va ayollar o‘rtasida tog‘ velosipedi, ya’ni “Mountain Bike” bo‘yicha O‘zbekiston kubogi bo‘lib o‘tdi.
Musobaqada Qoraqalpog‘iston Respublikasi, Samarqand, Xorazm, Sirdaryo, Toshkent viloyatlari jamoalaridan 120 nafar sportchi g‘oliblik uchun bahs olib borishdi.
Bahslar natijasiga ko‘ra, umumjamoa hisobida Samarqand viloyati jamoasi 1-o‘rinni, Xorazm viloyati jamoasi 2-o‘rinni, Toshkent viloyati jamoasi 3-o‘rinni qo‘lga kiritidi
Gandbol
2010-2011 yillarda tug‘ilgan o‘g‘il-qizlar o‘rtasida sportning gandbol turi bo‘yicha viloyat birinchiligi o‘tkazildi. Kattaqo‘rg‘on shahrida tashkil etilgan musobaqada tuman (shahar)lardan 200 nafardan ziyod ishtirokchi g‘oliblik uchun bellashdi.
Musobaqada o‘g‘il bolalar o‘rtasida birinchi o‘rin Ishtixon tumani, ikkinchi o‘rin Kattaqo‘rg‘on shahar va uchinchi o‘rin Past Darg‘om tumani jamoalariga nasib etdi. Qizlar bahsida ham ishtixonliklarning qo‘li baland kelgan bo‘lsa, keyingi o‘rinlarni Bulung‘ur tumani va Samarqand shahar qizlar jamoasi egalladi.
Og‘ir atletika
2009 yilda tug‘ilgan va undan kichik yoshdagi o‘g‘il bolalar o‘rtasida og‘ir atletika bo‘yicha viloyat birinchiligi g‘oliblari aniqlandi. Samarqand shahrida o‘tkazilgan musobaqada tuman (shahar)lardan 100 nafardan ziyod sportchi 10 ta vazn toifasida tosh ko‘tarib, quyidagi sportchilar g‘oliblikni qo‘lga kiritdi.
32 kg vaznda Ulug‘bek Aslamov, 36 kg vaznda Alisher Alijonov, 40 kg vaznda Azizbek Fayzullayev, 44 kg vaznda Avalboyev Fayozbek, 49 kg vaznda Sherali Po‘latov, 55 kg vaznda Abdullo Fralov, 61 kg vaznda Og‘abek Ismoilov, 67 kg vaznda Navro‘z Narzullayev, 73 kg vaznda Jonibek Sharifqulov, +73 kg vaznda Behruz Bozorov.
Ko‘pkurash
Viloyatimizning barcha hududida ko‘pkurash harbiy-vatanparvarlik musobaqasining tuman va shahar bosqichlari bo‘lib o‘tmoqda. Jumladan, «Tinchligimiz, taraqqiyot va farovonlik uchun!» shiori ostida ko‘pkurash harbiy-vatanparvarlik musobaqasining Ishtixon tumani bosqichi bo‘lib o‘tdi.
Unda 4 ta professional ta’lim muassasalari o‘quvchi-yoshlari ishtirok etib, ishtirokchilar musobaqa nizomiga asosan «Tezkor savol-javob bahsi», «AKM avtomatini qismlarga ajratish va yig‘ish», «Turnikka tortilish», «Estafeta yugurish» va «Pnevmatik quroldan o‘q otish» shartlari bo‘yicha o‘zaro bellashdi.
Musobaqa natijalariga ko‘ra, 1-son kasb-hunar maktabining «Lochinlar» jamoasi 1-o‘rinni, 2-son kasb-hunar maktabining «Shunqorlar» jamoasi 2-o‘rinni, pedagogika kollejining «Alpomish» jamoasi 3-o‘rinni egalladi.
Bekzod Ahmedov.
