“Vatanparvarlar” harbiy-sport musobaqasining viloyat bosqichi g‘oliblari aniqlandi

Markaziy harbiy okrugning “Sazag‘on” dala-o‘quv maydonida viloyatimizning barcha shahar va tumanlaridagi  maktablarning 10-, 11-sinf o‘quvchilari o‘rtasida Mudofaa vaziri kubogi uchun “Vatanparvarlar” harbiy-sport musobaqasining viloyat bosqichi bo‘lib o‘tdi.

Unda ishtirokchilar “Mohir mergan”, “Harbiy estafeta”, “Jabrlanuvchiga birinchi yordam ko‘rsatish”, “Safda qo‘shiq aytish”, “Duatlon” hamda “Temur tuzuklari bilimdoni” shartlari bo‘yicha  bellashdi.

Musobaqa natijasiga ko‘ra, Paxtachi tumanidagi 18-maktabning “Sohibqiron Temur” jamoasi birinchi o‘rinni egalladi. Kattaqo‘rg‘on tumanidagi 57-maktabning “Qalqon” hamda Past Darg‘omdagi 21-  maktabning “Sardor” jamoalariga ikkinchi va uchinchi o‘rinlar nasib etdi.

G‘olib jamoa va faol ishtirokchilar Markaziy harbiy okrug qo‘mondonligi hamda viloyat mudofaa ishlari boshqarmasining faxriy yorliq, diplom va qimmatbaho sovg‘alari bilan taqdirlandi.