«Yilning eng faol jurnalisti» viloyat tanlovida qatnashing!
Samarqand viloyati hokimligi va O‘zbekiston Jurnalistlari ijodiy uyushmasi viloyat bo‘limi «Yilning eng faol jurnalisti» an’anaviy tanlovini e’lon qiladi.
Unda televideniye, radio, internet va bosma nashrlar yo‘nalishlaridagi ijodiy ishlar qabul qilinadi.
Tanlov talablari quyidagicha:
- turli sohalarda amalga oshirilayotgan islohotlar va demokratik yangilanishlar jarayoni, jumladan, koronavirus pandemiyasi va favqulodda holatlarda jamiyatimizda odamlarimiz tomonidan namoyon etilayotgan fidoyilik, o‘zaro hurmat, mehr-oqibat va bag‘rikenglik kabi olijanob fazilatlar tobora mustahkamlanib borayotgani, Vatan taqdiri va istiqboliga daxldorlik tuyg‘usi ma’naviy hayotimizning uzviy qismiga aylanib borayotgani o‘z aksini topgan bo‘lishi lozim.
– viloyatimizda amalga oshirilayotgan ulkan yaratuvchanlik ishlari hamda yil dasturlari bilan bog‘liq jarayonlarni keng yoritib borish;
– yoritilayotgan mavzuga chuqur yondashish, haqqoniy tahlil qilish, mustaqil jurnalistik fikr yuritish, voqea-hodisalarga xolis fikr bildirish va jamoatchilik fikrini uyg‘otishga intilish;
– Vatan, xalq, jamiyat manfaatlari yo‘lida fidoyilik ko‘rsatib mehnat qilayotgan zamondoshlarimiz siymosini yaratish.
Quyidagi hujjatlarni yuborishingiz talab etiladi:
muallifning pasporti nusxasi;
muallif va uning professional faoliyati to‘g‘risida ma’lumotnoma (ob’yektivka);
muallifning ijodiy va ijtimoiy faoliyati to‘g‘risida ommaviy axborot vositasi rahbarining tavsiyanomasi;
muallifning manzili va aloqa telefonlari;
ijodiy ishlarining skaner va elektron nusxasi.
Tanlovga 2019 yil 1 iyunidan 2020 yilning 1 iyuniga qadar ommaviy axborot vositalarida e’lon qilingan ijodiy ishlar joriy yilning 20 iyunigacha tahririyatlar tavsiyasi bilan O‘zbekiston Jurnalistlari ijodiy uyushmasi viloyat bo‘limiga (+99893 339-99-84 telegram raqamiga) yuborilishi lozim.
G‘oliblar 27 iyun – Matbuot va ommaviy axborot vositalari xodimlari kuni arafasida e’lon qilinadi. Ular viloyat hokimligi va O‘zbekiston Jurnalistlari ijodiy uyushmasi viloyat bo‘limining diplom va qimmatbaho esdalik sovg‘alari bilan taqdirlanadi.
Murojaat uchun manzil: Samarqand shahri, Ulug‘ Tursunov ko‘chasi, 80-uy. Viloyat Matbuot uyi. Tel.: 233-91-69, 233-91-51.
