Estetik plastik jarrohlik amaliyotining salomatlikka zarari bormi?
CCV matbuot xizmatining plastik jarrohlik haqidagi savollariga Respublika ixtisoslashtirilgan dermatovenerologiya va kosmetologiya ilmiy-amaliy tibbiyot markazi bo‘lim mudiri Bobur Toirov javob berdi.
— Bugungi kunda ayollar o‘rtasida estetik jarrohlik amaliyotiga qiziqish yuqori, — deydi B.Toirov. — Biroq har qanday tibbiy muolajadan oldin bo‘lganidek, plastik jarrohlikda ham shifokor har bir bemor bilan individual tarzda suhbat o‘tkazishi lozim.
Suhbatda unga operatsiya jarayonining kechishi, og‘riqsizlantirish uslullari, qilingan amaliyot qanchalik natija berishi va kuzatilishi mumkin bo‘lgan asoratlar haqida tushuntiriladi.
Ayrim murakkab operatsiyalar bir necha bosqichda o‘tkazilishi bois bemor va uning yaqin qarindoshlari bunga ruhiy tayyor bo‘lishi zarur. Agar har bir muolaja yetuk mutaxassislar tomonidan bajarilsa, operatsiyadan so‘ng deyarli hech qanday salbiy o‘zgarish kuzatilmaydi.
— Plastik jarrohlik amaliyotidan avval bemor qanday tibbiy tekshiruvlardan o‘tadi hamda operatsiyadan so‘ng nimalarga e’tibor berish lozim?
— Har bir plastik operatsiyadan oldin bemorlar to‘liq klinik va laborator tekshiruvlardan o‘tadi. Agar tekshiruv jarayonida qo‘shimcha patologiyalar aniqlansa, operatsiya tor doiradagi mutaxassislar, ya’ni terapevt, pediatr, anesteziolog, endokrinolog, psixolog ko‘rigidan so‘ng amalga oshiriladi.
Bemor birinchi navbatda jarrohlik amaliyotidan keyingi asoratlardan ehtiyot bo‘lish lozim. Masalan, ayrimlar tanasida operatsiyadan so‘ng yiringlash kuzatilishi mumkin.
Qolaversa, infeksiyaning organizmga tushishi oqibatida sog‘lom to‘qimalar yallig‘lanadi. Ba’zi hollarda esa yiring o‘rni chandig‘ bo‘lib qolishi mumkin. Shu bois, bemor shifokor ko‘rsatmalariga to‘liq rioya qilishi, har bir muolajani u bilan bamaslahat amalga oshirishi zarur.
