Кинолардаги 2025 йил: Ўтмишда суратга олинган фильмларда ушбу йилги воқеалар қандай башорат қилинган

Яқин ўтмишда суратга олинган кинофильмларда бир неча ўн йилликлар ичида дунё қандай бўлиши ҳақида тасаввурлар қилиниб, келажакка назар ташлашга ҳаракат қилинган. XX ва XXI аср бошларида содир бўлиши мумкин бўлган глобал фалокатлар ва ақл бовар қилмас технологик ютуқлар бошланғич нуқта бўлиб хизмат қилган футуристик сценарийлар битилган фильмларда 2025 йил ҳам эътибордан четда қолмади.

Ушбу башоратлар рўёбга чиққан чиқмаганлигин солиштириб чиқамиз.

У (2013)

Сюжетга кўра, 2025 йилда технологиялар шу даражага етганки, сунъий интеллект одамларнинг тўлақонли ҳаёт шеригига айланиб қолган. Бош қаҳрамон хат ёзувчиси (фильмда бу келажакдаки касб, чунки одамлар хат ёзишни бутунлай унутиб қўйган), суққабош Теодор операцион тизимни сотиб олади ва у билан ҳиссий жиҳатдан яқинлашади, чунки бундай мулоқотнинг ҳақиқий одам билан мулоқотдан ҳеч қандай фарқи йўқ. Аста-секин бу алоқа виртуал ишқий муносабатга айланиб қолади.

Вақт патрули 2: Берлин қарори (2003)

Махфий ташкилот келажакда содир бўлиши мумкин бўлган жиноятларнинг олдини олиб, вақт чизиғини патруль (назорат) қилади. Томошабинга ҳозирги кунга таҳдид соладиган парадокс оқибатларини тузатишга уриниш кўрсатилади. Бош қаҳрамон вақт узлуксизлигини бузиш билан таҳдид қилувчи фитнани бартараф этиш учун келажак, яъни 2025 йилдаги Берлинга боради. Воқеалар вақт қуролга айланган, технологиялар эса ўтмиш ва келажак воқеаларини назорат қилишга имкон берадиган дунёда содир бўлади.
Тинч океан чегараси (2013)

2025 йилда баҳайбат Кайдзю махлуқлари Тинч океанидаги ёриқ орқали Ерга бостириб кириб, шаҳарларни вайрон қилади. Инсоният уларни тўхтатиш учун нейрон алоқа орқали бошқариладиган махсус робот-ўқчилар дастурини яратади. Фильм сюжети Кайдзюларнинг сўнгги омон қолган шаҳарларга қилаётган ҳужумларга қарши курашиб, апокалипсисни тўхтатиши вазифаси юкланган икки учувчи ҳақида гапиради.

Ўйин тугаши - Бронкс учун сўнгги жанг (Италия, 1983)

Ҳодиса 2025 йилда, глобал фалокат ва цивилизациянинг қулаши ортидан вайрон бўлиб, хавфли жойга айланган, қуролли гуруҳлар томонидан назорат қилинадиган зоналарга бўлинган Нью-Йорк шаҳрида содир бўлади. Бу ерда ҳукумат намояндалари эрмаги учун гладиатор жанглари ташкил этилган. Ушбу ўлим ўйинларининг профессионал иштирокчиси қуролли отрядлар томонидан таъқиб қилинаётган гуруҳига ҳамроҳлик қилиб, Бронксдан қочишга ҳаракат қилади.

10 йил (Гонконг, 2015)

Воқеалар 2025 йилда авторитар бошқарув кучаяётган Гонконгда бўлиб ўтади. Фильм бешта ҳикоядан иборат бўлиб, уларнинг ҳар бири оддий одамларнинг ҳаётини акс эттиради. Эркинлик чекловлари, маданий таназзул ва ижтимоий муаммоларга дуч келган фуқаролар ўз эътиқодлари ва инсоний қадр-қимматини сақлаб қолишга ҳаракат қилишади.

Жакузидаги вақт машинаси-2 (2015)

Биринчи қисмда учта дўст ва бирининг жияни сирли жакузи ёрдамида тасодифан ўтмишга, 1986 йилга қайтади. Иккинчи қисмда эса қаҳрамонлар носозлик туфайли ўзларини 2025 йилда топадилар.

Келажакда улар ўзларининг ўтмишдаги қарорлари оқибатларига дуч келишади: улар тузган компаниялар глобал корпорацияларга айланган ва атрофдаги дунё абсурд технологик ихтиролар ва тартибсиз ижтимоий ўзгаришлар билан тўлдирилган. Йигитлар ўз замонасига қайтишга ҳаракат қилиб, илгари яратган муаммоларини тузатишга мажбур бўлишади.

Б.Муҳаммадиева тайёрлади.