27 nafar sudya intizomiy javobgarlikka tortildi, 8 nafar sudyaning vakolati muddatidan ilgari tugatildi
30 noyabr kuni Oliy sudda “Odil sudlovni ta’minlash – O‘zbekistonni korrupsiyadan xoli hududga aylantirishning muhim omili” mavzusida o‘tkazilgan konferensiya davomida Korrupsiyaga qarshi kurashish agentligi direktori o‘rinbosari ayrim sudyalar tomonidan Sudyalarning odob-axloq kodeksi talablarini buzganlik va g‘ayriqonuniy xatti-harakatlari sodir etganliklari holatlarini qayd etdi.
Faqat holatlar aytilib, ko‘rilgan choralar haqida gapirilmaganligi sababli, bu masala tushunmovchiliklar keltirib, qator ijtimoiy tarmoqlarda keng muhokamaga sabab bo‘ldi.
Shu o‘rinda joriy yilning 11 oyi mobaynida haqiqatdan ham o‘z faoliyatida kamchiliklarga yo‘l qo‘ygan 27 nafar sudya intizomiy javobgarlikka tortilganligi, shuningdek, 8 nafar sudyaning vakolati muddatidan ilgari tugatilganligi ma’lum qilinadi.
Bu haqda O‘zbekiston Respublikasi Oliy sudi matbuot xizmati xabar berdi.
