Bugun tug‘ilgan kun

O‘zbekiston Fanlar akademiyasi akademigi, O‘zbekistonda xizmat ko‘rsatgan fan arbobi Boturxon Valixo‘jayev 1932 yil 1 aprelda Samarqandda tug‘ilgan.

Samarqand davlat universiteti filologiya fakultetida tahsil olgan. Shu oliy dargohda o‘qituvchi, fakultet dekani o‘rinbosari, dekan, tojik tili va adabiyoti kafedrasi, o‘zbek adabiyoti tarixi kafedrasi mudiri, prorektor lavozimlarida mehnat qilgan.

Olimning ilmiy ishlari adabiyot tarixi, adabiyotshunoslik, adabiy aloqalar, tasavvuf va uning namoyandalari, Samarqand adabiy va ilmiy muhiti tarixi, Ibn Sino, Nizomiy, Jomiy, Navoiy kabi alloma va mumtoz shoirlarning ijodiga bag‘ishlangan.

Boturxon Valixo‘jayev "O‘zbekiston adabiy-tanqidiy qarashlari tarixidan", "O‘zbek epik poeziyasi tarixidan", "Navoiy ijodi - ilhom manbai", "Xoja Ahror Vali", "Xoja Ahror tarixi" kabi ilmiy asarlari va bir nechta o‘quv qo‘llanmalar muallifi.

Adabiyotshunos olimning asarlari Rossiya, Afg‘oniston, Turkiya va Eronda nashr etilgan.

Boturxon Valixo‘jayev 2005 yil 25 avgustda vafot etgan.