Shavq birla seni Farg‘onajon, Farg‘ona derlar
Oxunjon Hakimov
FARG‘ONA DERLAR
Shavq birla seni Farg‘onajon, Farg‘ona derlar,
Bu olam aro durdonadan durdona derlar.
Bog‘u rog‘laring, azim tog‘laring buncha purviqor,
Husnu tarovatda seni bir dona derlar.
Lafzi halol, so‘zlari bol, qatorda norim,
Odatlaring, udumlaring sharqona derlar.
Mevasi bol, suvi zilol, jannatmakonsan,
Bosgan qadaming har jabhada mardona derlar.
Lobar qizlar-u, chaqmoqdayin o‘g‘lonlaringni
Arzir ming qo‘shiq birla g‘azal, dostona derlar.
Sha’ningga sening ash’or bitib tolmas Oxunjon,
Husningga boqib, shomu sahar mastona derlar.
***
Muhtarama Ulug‘ova
KO‘Z YuMIB OChGUNChA...
Dilu jon istagi - farog‘at,
Tariqcha himmatim - ovoza.
Chin hojattalabga mehrimning
Ostona, ravoqi ko‘-o‘p baland.
Ko‘z yumib ochguncha...
Kunlarga nafsimning amri – shoh
Va poyi-patak his - vaziri.
Bo‘ynimda tarangdir ilinjning
Ko‘ringich, ko‘rinmas zanjiri.
Ko‘z yumib ochguncha...
Tugamas hech qornim tashvishi,
Na qunda qo‘nim bor, na tunda halovat.
Sochga oq tushdi, lek qaydadir
Qalbimga fasli nur - balog‘at?..
Ko‘z yumib ochguncha...
Ulgurarmikanman
Ko‘zim ochishga?
***
Enaxon Siddiqova
AYoL KETIB BORAR…
Ayol ketib borar yonib, guvillab,
Ko‘nglida tiriklik qo‘ng‘iroqlari.
Shamollar poyida yig‘lar bosh urib,
Sochib yuboradi gul yaproqlarni.
Ketib borar ayol… ko‘ngliga ishqmas,
Tikib tiriklikning bayroqlarini.
Qulog‘i kar dunyo, hayhot eshitmas,
Selday toshgan faryod, ingroqlarini.
Ayol ketib borar… tunday yoyilgan
Baxtsizlikday qaro sochlarin g‘ami.
Ko‘ngil mehrobiga yoqib qo‘yilgan
Qirq bitta jonining qirq bitta shami.
Ketib borar ayol… yolg‘izlik aro
Sirpanchiq yo‘llari, qirovli, muzli.
Onhazratning ummatlari, xeshlari,
Hazrati erkaklar, eshityapsizmi?
Bu ketishi go‘yo ko‘chkilar kabi,
Qurbon qushday to‘zg‘ir dil rishtalari.
Muhabbatdan ketar, ko‘ngildan ketar
Xudoning yerdagi farishtalari.
Ketib borar ayol yonib, guvillab…
***
Zuhra Aliyeva
AYo DO‘ST...
Ayo do‘st, qoshingizga bir ziyolar axtarib keldim,
Adam sahrosidan mehrigiyolar axtarib keldim.
Yeru osmon aro topmay qo‘ngilday ko‘ngli dog‘lini,
Bu xasta jonima malham, shifolar axtarib keldim.
Muhabbat ahlini ko‘rdim, ko‘zi yosh, ko‘ngli vayrondir,
Kechib g‘am dashtidin, nurli safolar axtarib keldim.
Zaru zo‘r istamam zinhor, dilimda ohu zorim bor,
Navosoz ko‘nglima savti navolar axtarib keldim.
Bahorim qaytmadi, yozim chechaklar bargida ketdi,
Xazon faslida bir hushbo‘y havolar axtarib keldim.
Darig‘o, bu falakdin jonig‘a topmish omonlikkim,
Na deb, Zuhro, bu olamga vafolar axtarib keldim.
