Fransiyada dunyodagi eng keksa ayol 118 yoshida vafot etdi
Tulondagi qariyalar uyida dunyodagi eng keksa ayol - rohiba Lyusil Randon 118 yoshida uyqusida tinchgina vafot etdi, deb xabar bermoqda Guardian.
2022 yil aprel oyida Yaponiyada 119 yoshli Keyn Tanaka vafot etgach Randon Yevropaning eng keksa odami hisoblanardi. Ko‘p intervyularda fransuz ayol Rabbiy irodasi deya, uzoq umr ko‘rish sabablarini taxmin qilishdan bosh tortgan, ammo 2022 yil aprel oyida buni mehnat bilan bog‘liq bo‘lishi mumkinligini aytdi: u 108 yoshgacha ishladi, deb eslaydi Le Figaro.
Lyusil Randon 1904 yil 11 fevralda protestant oilasida tug‘ilgan. U Birinchi jahon urushi paytida juda ko‘p qayg‘ularni boshdan kechirganini eslar ekan, hayotidagi eng katta quvonchi uchta ukasidan ikkitasining urushdan tirik qaytishi deb aytgan.
1979 yildan beri Randon qariyalar uylarida yashab, u yerda boshqa keksalarga g‘amxo‘rlik qilishda va hatto butunlay ko‘r bo‘lgan va faqat nogironlar aravachasida harakatlana olganda ham tasalli berishda davom etgan.
Uzoq umr ko‘rishning mutlaq chempioni 1997 yilda 122 yoshida vafot etgan fransuz ayoli Jan Kalmandir.
