Futbol: Messi, Ramos "PSJ"dan, Benzema va yana uch futbolchi "Real"dan ketdi
"Yulduz"larning aksariyati Yevropa klublarini tark etib, Saudiya Arabistoni klublariga o‘tmoqda
Joriy mavsum "PSJ" Fransiya chempioniga aylandi. Mbappe, Neymar, Messi, Ramos va boshqalar mavsumning ikkita muhim titulidan biriga ega chiqdi. Lekin bu safargisi qayg‘uli chempionlik bo‘ldi. Chunki Messi va Ramos mavsum yakunida Parij klubini tark etdi.
35 yoshli argentinalik futbolchi 2021 yilning yozidan buyon "PSJ"da o‘ynamoqda. U parijliklar safida 74 ta o‘yinda maydonga tushib, 32 ta gol urgan va 35 ta golga assistentlik qilgan. OAV xabarlariga ko‘ra, Messiga asosiy da’vogarlar Saudiya Arabistonining "Al Hilol" klubi va MLS vakili "Inter Mayami" bo‘lib, "Barselona"ga qaytish varianti ham istisno qilinmayapti.
Shuningdek, ispaniyalik futbolchi Serxio Ramos "PSJ" klubi safida ikki mavsum o‘tkazdi. Barcha davrlarning eng yaxshi himoyachilaridan biri "PSJ"da 57 ta o‘yin o‘tkazib, 5 ta gol urdi. Unga ham Saudiya Arabistoni klublaridan taklif tushmoqda.
Ispaniyaning "Real Madrid" klubi mavsum so‘ngida to‘rt nafar futbolchining ketishini e’lon qildi. Jamoani Eden Azar, Marko Asensio, Karim Benzema va Mariano Dias tark etdi. Nacho tez orada ularga qo‘shilishi mumkin. Shuningdek, Saudiya Arabistoniga chaqirilgan Luka Modrich hali yangi shartnoma imzolagani yo‘q.
Benzema esa Saudiya Arabistonining "Al-Ittihod" klubi bilan ikki yillik shartnoma imzoladi. OAV xabariga ko‘ra, Karim "Al Ittihod"da ikki yilda soliqlardan tashqari 200 million dollar maosh oladi. Uning o‘rniga "Real" Angliyaning "Tottenxem" klubi hujumchisi Harri Keyn nomzodini ko‘rib chiqmoqda. Klubning yana bir yulduzi Marko Asensio rasman "PSJ" klubi bilan 4 yillik shartnoma imzoladi. Asensio La liganing joriy mavsumida 31 o‘yinda maydonga tushib, 9 gol muallifiga aylandi.
Italiyanining "Milan" klubi hujumchisi Zlatan Ibragimovich futbolchilik faoliyatini 41 yoshida yakunladi. Shvetsiyalik futbolchi A seriyaning so‘nggi turida bo‘lib o‘tgan "Milan" – "Verona" (3:1) uchrashuvidan keyin o‘z qarorini e’lon qildi.
Zlatan Ibragimovich professional futbolchilik faoliyatini 1999 yilda boshlagan. U Shvetsiya terma jamoasi safida 122 ta o‘yinda maydonga tushib, 62 ta gol urgan. Bu Shvetsiya uchun rekord natija hisoblanadi. Hujumchi faoliyati davomida 34 ta sovrinni qo‘lga kiritgan.
Endi futbol yulduzlarining Yevropa klublarini tark etib, Saudiya Arabistoni klublariga yo‘l olayotgani haqida ikki og‘iz.
Saudiya Arabistoni futbol klublarini xususiylashtirish loyihasini boshlagan ko‘rinadi.
Mamlakatda sportni rivojlantirishga qaratilgan “Vision 2030” loyihasi doirasida Saudiya Arabistoni valiahd shahzodasi Muhammad bin Salmon Al Saud sport klublarini sarmoyalash va xususiylashtirish loyihasini ishga tushirdi.
Loyiha hozirgi bosqichda ikki yo‘nalishdan iborat. Birinchisi, yirik kompaniyalarga ushbu jamoalarning egalik huquqini ularga o‘tkazish evaziga sport klublariga sarmoya kiritish imkonini beradi. Ikkinchisi, 2023 yil oxiridan boshlab bir qator sport klublarini xususiylashtirishni nazarda tutadi.
Loyihaning maqsadi - sport sohasiga investitsiya imkoniyatlarini rivojlantirish, shuningdek, klublarning raqobatbardoshligi va infratuzilmasining sifatini oshirishdan iborat.
Qolaversa, loyiha tufayli mamlakatda futbol va uning raqobatini rivojlantirish kutilmoqda, bu esa “Saudiya Arabistoni ligasini dunyoning Top-10 ligasi qatoriga kiritish” imkonini beradi.
Saudiya Arabistoni chempionatining daromadi yiliga 450 million rialdan (112 million yevro) 1,8 milliard rialga (450 million yevro) oshishi, shuningdek, liga qiymatining 3 milliarddan 8 milliard rialga ko‘tarilishi kutilmoqda.
Saudiya Arabistoni chempionatida boshqa "yulduz"lar qatori “An-Nasr” o‘yinchisi Krishtianu Ronaldu ham o‘ynaydi. "Real"ning sobiq hujumchisi Karim Benzema ham "Al-Ittihod"ga o‘tdi. Shuningdek, Serxio Ramos, Serxio Buskets, N’Golo Kante va Jordi Albalarni ham yaqin orada Saudiya klublarida ko‘rishimiz mumkin.
Chunki saudiyaliklar Yevropa yulduzlarini ko‘p maosh, qulay sharoit va soliqlardan ozod qilgan holda yoki kam soliq to‘lash sharti bilan Osiyoga olib kelmoqda.
Fazliddin Ro‘ziboyev tayyorladi.
