Global fuqaro qanday bo‘lish kerak?
Toshkent shahrida «Jurnalistlarni qayta tayyorlash markazi» va Germaniyaning O‘zbekistondagi kattalar ta’limi tashkiloti (DDV International) tomonidan jurnalist, bloger va ko‘ngillilar uchun uch kunlik seminar-trening tashkil etildi.
"Global fuqarolik, uning ahamiyatini tushunishga ko‘maklashish va bu sohadagi ko‘nikmalarni rivojlantirish, ommaviy axborot vositalari va ijtimoiy tarmoqlarda jurnalistlar, blogerlar va ko‘ngillilar materiallari orqali mazkur mavzuni targ‘ib qilish" mavzuida o‘tkazilgan treningda respublikada faoliyat yuritayotgan ommaviy axborot vositalari vakillari, blogerlar ishtirok etdi.
Seminarda millatlararo va dinlararo bag‘rikenglik g‘oyalarini ilgari surish va jamiyatda madaniy xilma-xillikni yanada rivojlantirish, ommaviy axborot vositalari va ijtimoiy tarmoqlardagi axborot ishlari yordamida mamlakatda tinchlik va barqarorlikni saqlashga faol ta’sir o‘tkazish kabi tushunchalar bo‘yicha ma’lumot berildi. OAVda sifatli materiallar orqali fuqarolarni buzg‘unchilik faoliyatiga jalb qilinishining oldini olish, nizolar va kamsitilishlarning paydo bo‘lishiga qarshi xabardor qilish bo‘yicha mashg‘ulotlar o‘tildi.
- Global fuqaroviylik - global jamiyat va yagona insoniyatga daxldorlik hissini anglatadi, uning a’zolari esa global darajadagi birdamlik va jamoaviy javobgarlik tuyg‘usini anglash xususiyati bilan ajralib turadi, - deydi ekspert, PhD falsafa doktori Farhod Karimov. - Global fuqaroviylikning maqsadi - inson qadr-qimmatini himoya qilish, ijtimoiy hisobdorlik va xalqaro hamjihatlikka erishish demakdir. Globallashuv nimadan boshlanadi? Biror bir millatga, biror bir shaxsga emas, balki barchaga teng bo‘lgan va barcha foydalana oladigan hayot turmush tarzi.
Global fuqaroviylik mas’uliyati faqat bir shaxsga tegishli bo‘lib qolmay, turli yosh, boy va kambag‘al, har bir soha vakili, doimiy va vaqtincha yashovchi, umuman, barcha insonlarga tegishlidir.
Seminar davomida bu jarayonda ommaviy axborot vositalarining o‘rni, ular o‘z maqolalarida bu mavzuni yoritishda e’tibor qaratadigan jihatlari haqida so‘z bordi.
Trening yakunida ishtirokchilarga tashkilotlar tomonidan ishtirokchilarga diplom va esdalik sovg‘alar topshirildi.
Munisa Shamsiyeva.
