Ijodkorlar karantin davrida muxlislarni zeriktirmadi
Aholining badiiy ijodga yanada yaqinlashtirish, ularning bo‘sh vaqtlarini samarali o‘tishini ta’minlash, kitob mutolaa qilishga undash va albatta sog‘lom turmush tarzini targ‘ib etish maqsadida koronavirus pandemiyasi sababli e’lon qilingan karantin davrida O‘zbekiston Yozuvchilar uyushmasi Samarqand viloyati bo‘limi onlayn tarzda bir qator ijodiy haftalik va ko‘rik-tanlovlar o‘tkazdi.
Jumladan, 2020 yilning mart-aprel oylarida telegram guruhi va kanallarida "Uyda qoling!" nomli ko‘rik-tanlov e’lon qilindi. Tanlovga yuzlab ijodkorlarning ijodiy ishlari kelib tushdi. She’rlar hakamlar hay’ati tomonidan ko‘rib chiqildi va g‘oliblar aniqlandi. Unga ko‘ra, 1-o‘rinni shoira Jumagul Suvonova, 2-o‘rinni Shavkat Bobomurod va Rizo Xalil,
3-o‘rinni Shahriddin Umirov va Qahramon Eshmurodov qo‘lga kiritdi.
Sohibqiron Amir Temur tavallud kuni munosabati bilan 2020 yil 2-8 aprel kunlari telegram guruhimiz orqali o‘tkazilgan "Sohibqiron Amir Temur haftaligi" onlayn tanlovida ham viloyat ijodkorlari faol ishtirok etdi. Unda "Urgut sadosi" gazetasi jamoasi birinchi, havaskor ijodkorlar - Qo‘chqor hoji Hayitov va Xolbo‘ta Xo‘janov ikkinchi va uchinchi o‘rinlarni egalladi.
O‘zbekiston xalq shoiri Muhammad Yusuf tavallud kuni munosabati bilan 20-27 aprel kunlari telegram guruhimiz orqali shoir hayoti va ijodiga bag‘ishlangan onlayn ijodiy haftalik o‘tkazildi. Uyushmamizning telegramm kanaliga muxlislardan ko‘plab she’rlar, shoir ijodidan o‘qilgan asarlarga videoroliklar kelib tushdi. Kattaqo‘rg‘onlik shoir Hasan Almatov tanlovning mutlaq g‘olibi bo‘ldi. Birinchi o‘rinni esa qo‘shrabotlik o‘qituvchi Mirzohid Musoqulov, navoiylik Hilola Almatova egalladi.
Ikkinchi o‘rin Samarqand shahridagi 18-umumiy o‘rta ta’lim maktabi o‘quvchisi Sevinch Usmonova, Narpay tumanidagi 64-maktab o‘quvchisi Charos Yusupovaga munosib ko‘rildi.
Yosh shoir Mohir Bek, shoira Tozagul Jumanova shoirga bag‘ishlangan ehtirom she’rlari uchun uchinchi o‘rin sohibi bo‘lishdi.
O‘zbekiston Yozuvchilar uyushmasi Samarqand viloyati bo‘limi.
