Ijtimoiy ehtiyojmand oilalarning farzandlarini davlat qaramog‘iga oladi

Hukumat qarori (257-son, 28.03.2019 y.) bilan Ijtimoiy ehtiyojmand oilalarning iqtidorli farzandlarini uzluksiz ta’lim olishini moddiy va ma’naviy jihatdan qo‘llab-quvvatlash tartibi to‘g‘risidagi nizom tasdiqlandi, deb xabar bermoqda huquqiy axborot kanali.

Nizomga muvofiq, ijtimoiy ehtiyojmand oilalarning iqtidorli farzandlarini uzluksiz ta’lim olishini moddiy va ma’naviy jihatdan qo‘llab-quvvatlash yoshlar masalalari bo‘yicha hududiy idoralararo kengashlar tomonidan amalga oshiriladi.

Bolalarni qo‘llab-quvvatlash uchun O‘zbekiston yoshlar ittifoqining boshlang‘ich tashkilotlari va mahallalar har yili 1 iyungacha idoralararo kengashlarga yozma tavsiya bilan birga quyidagi hujjatlar taqdim etadi:

 •o‘quvchilarning yutuqlarini tasdiqlovchi hujjatlar (mavjud bo‘lganda);

 •o‘quvchi va oila a’zolarining pasporti yoki tug‘ilganlik to‘g‘risidagi guvohnoma nusxalari;

 •nogironlikni tasdiqlovchi hujjatlar nusxasi (mavjud bo‘lganda);

 •boquvchisini yo‘qotganlik to‘g‘risidagi hujjat nusxasi (mavjud bo‘lganda).

Hujjatlar har yili 10 iyungacha idoralararo kengashlar tomonidan ko‘rib chiqiladi hamda 15 iyunga qadar viloyat kengashlariga taqdim etiladi.

Qo‘llab-quvvatlash bo‘yicha qaror har yili 30 iyunga qadar qabul qilinadi.

O‘quvchilar quyidagilar bilan ta’minlanadi:

zamonaviy yagona maktab formasi;

• asosiy turdagi o‘quv qurollari;

• badiiy kitoblar.

Shuningdek, o‘quvchilarga gazeta va jurnallarga obuna bo‘lishda amaliy yordam ko‘rsatiladi hamda ularning respublika oromgohlarida dam olishi va sayohatlar tashkil etiladi.