Islom taraqqiyot banki - O‘zbekistondagi islohotlar ko‘makchisi
Yurtimizda xalq manfaatlariga qaratilgan islohotlarni amalga oshirish, shahar va qishloqlarimizda bunyodkorlik ishlarini olib borishda xalqaro moliya tashkilotlari ham ishtirok etmoqda. Islom taraqqiyot banki (ITB) ana shunday hamkorlardan biri hisoblanadi.
1975 yilda faoliyat boshlagan mazkur bankka Islom hamkorlik tashkilotiga qo‘shilgan har bir mamlakat a’zo bo‘lish huquqiga ega.
O‘zbekiston 2003 yildan buyon ITB a’zosi hisoblanadi. Ushbu xalqaro moliya tashkiloti yurtimizda sog‘liqni saqlash, energetika, qishloq xo‘jaligi, qurilish, maktab va kollejlarni jihozlash, avtomobil yo‘llarini qurish va ta’mirlash, davlat moliya tizimida islohotlar o‘tkazish kabi sohalardagi loyihalarni moliyalashtirib kelmoqda.
Jumladan, qishloq joylarda uy-joylar qurilishini amalga oshirishda ITB asosiy hamkorlardan biri hisoblanadi.
Bank ajratgan mablag‘ hisobidan 2015 yilda Samarqand viloyatida namunaviy loyihalar asosida 355 ta uy-joy qurilgan edi. “Qishloqqurilishinvest” injiniring kompaniyasi mas’uliyati cheklangan jamiyati Samarqand filialidan ma’lum qilishicha, bu uylarning 100 tasi Past Darg‘om tumani Kashshof, Hindiboy, Go‘zalkent massivlarida,155 tasi Oqdaryo tumani Po‘latdarxon va Naymancha mahallalarida, yana 100 tasi Jomboy tumani Moylichuqur qishlog‘ida qurilgan.
– Bizda, odatda, uy uchun boshlang‘ich to‘lov to‘langach, kredit rasmiylashtirilib, “Qishloqqurilishinvest” injiniring kompaniyasiga pul o‘tkazib berilganidan boshlab uy egasi kredit foizlarini to‘lab borardi, – deydi “Qishloqqurilishbank” Samarqand filiali qishloq qurilishini kreditlash va monitoring qilish bo‘limi boshlig‘i Shamshod Uzoqov. – Islom taraqqiyot banki tomonidan moliyalashtirilgan namunaviy uylar uchun esa boshqacha bo‘ldi. Bank mas’ullari uy-joy bilan birga, massivda qurilish ishlari to‘la yakunlanib, kommunikatsiya tizimlari yaratilgach, fuqarolar nomiga kredit rasmiylashtirilishi va foiz to‘lovlari to‘lanishini bildirishdi. Albatta, biz shunday yo‘l tutdik. Aholi tomonidan to‘langan boshlang‘ich to‘lov va ITB ajratgan mablag‘ injiniring kompaniyasiga o‘tkazib berildi. Uylar o‘sha yil – 2015 yilning o‘zida qurib bitkazildi. Ko‘plab oilalar yangi uyga ko‘chib kirdi. Lekin massivlardagi yo‘l va boshqa infratuzilma ob’yektlari qurilishi 2017 yil yakuniga qadar davom etdi. Bu orada ITB vakillari har bir jarayonni kuzatib bordi, ob’yektlarga chiqib, qurilish ishlari bilan tanishdi. Massivlar to‘la tayyor bo‘lib, foydalanishga qabul qilingach, 2017 yil dekabr va 2018 yil yanvar oylarida fuqarolar nomiga kredit rasmiylashtirilib, ular belgilangan imtiyozlar davridan keyin kredit foizlarini to‘lay boshladi. Bu yangi uyga ega bo‘lgan yurtdoshlarimiz uchun juda katta yengillik, imkoniyat bo‘ldi.
– Bizning uyimiz Islom taraqqiyot banki tomonidan ajratilgan mablag‘ asosida moliyalashtirilgan, – deydi Oqdaryo tumani Po‘latdarxon mahallasida yashovchi D.Sulaymonov. – 2015 yilda qurib bitkazildi va o‘sha yilning avgust oyida ko‘chib kirgandim. Lekin o‘sha yili faqat boshlang‘ich to‘lovni to‘laganmiz. Mahalladagi barcha qurilishlar tugatilib, yo‘l, irrigatsiya tizimlari qurilgach, 2018 yildan kredit foizlarini to‘lay boshladik. Uch yil bizga kredit foizlarini to‘lashda yaxshigina imtiyoz bo‘ldi.
Bugun mamlakatimizda ITB Boshqaruvchilar Kengashining 46-yillik yig‘ilishi o‘z ishini boshladi. O‘zbekistonning mazkur xalqaro moliya tashkiloti bilan yaqin hamkorligi mamlakatimizda amalga oshirilayotgan ijtimoiy-iqtisodiy islohotlar samaradorligini ta’minlashga xizmat qiladi.
