Kanadada yong‘in: AQShning bir necha shaharlari quyuq tuman bilan qoplandi

Kanadada yuz bergan o‘rmon yong‘inlari tutuni AQShning sharqiy shtatlariga yetib kelib, poytaxt Vashington va Nyu-York kabi bir qator yirik shaharlar osmoni quyuq tuman bilan qoplandi.

Ushbu hududlarda havo nafas olish uchun nosog‘lom darajaga yetgan. Yirik aeroportlarda reyslar to‘xtatildi, beysbol ligasi o‘yinlari qoldirildi hamda odamlardan ko‘chaga chiqmaslik so‘raldi. Tashqarida esa pandemiya davridagi niqoblarni taqib yurish tavsiya qilinmoqda.

Kanada ayni paytda mamlakat bo‘ylab davom etayotgan 400 dan ortiq o‘rmon yong‘inlarini to‘xtatish uchun boshqa davlatlardan yordam so‘ramoqda.