Koronavirusga chalingan bemorning kim bilan muloqot qilganligini ko‘rsatuvchi mobil ilova joriy etiladi
O‘zbekiston Sog‘liqni saqlash vaziri Alisher Shodmonov va Koreya Respublikasi Sog‘liqni saqlash va ijtimoiy ta’minot vaziri Pak Ning Xu o‘rtasida telefon orqali muloqot bo‘lib o‘tdi. Unda tibbiyot sohasidagi hamkorlikni yanada kengaytirish, shu jumladan, COVID-19 ga qarshi kurash borasida birgalikdagi sa’y-harakatlarni kuchaytirish masalalariga alohida e’tibor qaratildi.
Muloqot avvalida, Sog‘liqni saqlash vaziri koronavirus infeksiyasiga qarshi kurashda, shuningdek, ushbu mamlakat mutaxassislari bilan hamkorlikda poytaxtimizda to‘rtinchi avlod Bolalar milliy tibbiyot markazini bunyod etishda Koreya Respublikasi tomonidan ko‘rsatilayotgan amaliy yordam uchun chuqur minnatdorchilik bildirib o‘tdi. Suhbat davomida ikki mamlakat vazirlari yurtimizda Koreyaning yetakchi tibbiyot universitetining filialini ochish, tibbiyot klasterini tashkil etish masalalarini keng muhokama qildilar.
Muhimi, ikki davlat vazirlari yurtimizda tegishli vazirlik va idoralar bilan birgalikda COVID-19 ga qarshi mobil ilovalarni yaratib, treking usulini joriy etish borasida kelishuvga erishdi. Bu esa bizga xuddi Koreyadagidek koronavirusga chalingan bemorning kim bilan muloqot qilgani va kaysi hududlarda bo‘lganligini innovatsion tarzda aniq ko‘rsatib berish imkoniyatini yaratadi.
Bundan tashqari, hamkorlikda koronavirus infeksiyasiga qarshi kurashda testlar va dorilarni ishlab chiqish masalalari ham muhokama etildi. Jumladan, koronavirusga qarshi vaksinaning birgalikda klinik sinovlarini o‘tkazish to‘g‘risida ham kelishuvga erishildi. O‘z navbatida, Koreya Sog‘liqni saqlash va ijtimoiy ta’minot vaziri Pak Ning Xu ushbu vaksinani dunyo mamlakatlariga taqdim etishda O‘zbekiston alohida ustuvor mavqega ega bo‘lishini ta’kidladi.
Samarali kechgan muzokaralar yakunida Sog‘liqni saqlash sohasida O‘zbekiston – Koreya hamkorligi markazining imkoniyatlarini yanada kengaytirishga ham kelishib olindi.
Eslatib o‘tamiz, Koreya Respublikasi Sog‘liqni saqlash va ijtimoiy ta’minot vaziri Pak Ning Xu o‘tgan yil aprel oyida mamlakatimizga tashrifi davomida Sog‘liqni saqlash vazirligining “O‘zbekiston Respublikasi sog‘liqni saqlash a’lochisi” ko‘krak nishoni hamda Toshkent tibbiyot akademiyasining Faxriy professori unvoni bilan taqdirlangan edi.
Sog‘liqni saqlash vazirligi jamoatchilik bilan aloqalar bo‘limi ma’lumotiga ko‘ra, hozirda ikki davlat o‘rtasida sog‘liqni saqlash sohasida hamkorlikda muhim islohotlar amalga oshirilmoqda. Jumladan, sohaning huquqiy asoslari, tibbiyot xodimlarining bilim va malakasini yanada oshirish, elektron tibbiyotni joriy etish, davlat-xususiy sektor hamkorligi, tibbiy turizm hamda tibbiy sug‘urta sohasida mutaxassislar almashinuvi bo‘yicha qator qo‘shma loyihalarni amalga oshirish borasida izchil sa’y-harakatlar qilinmoqda.
