Mahallalardagi hokim yordamchilariga 2,5 trillion so‘m yo‘naltiriladi
2022 yilgi byudjet xarajatlaridagi o‘zgarishlardan biri — mahallabay ishlashning yangi tizimi uchun 2,5 trillion so‘m mablag‘ ajratish rejalashtirilgani. Ushbu mablag‘ bevosita hokim yordamchilari tomonidan tasarruf etiladi.
Shuningdek, 2022 yilgi davlat byudjeti to‘g‘risidagi qonun loyihasiga ko‘ra, qishloq xo‘jaligini rivojlantirish davlat dasturlari va tadbirlari uchun byudjetdan 20,3 trillion so‘m, markazlashgan investitsiya xarajatlari uchun 21,7 trillion so‘m ajratish rejalashtirilgan.
Byudjet xarajatlari samaradorligini oshirish uchun kelgusi yildan 40 dan ortiq vazirlik va idoralarning xarajatlari maqsadli indikatorlar asosida shakllantiriladi. Bunday indikatorlarni ishlab chiqishda Jahon banki, Osiyo Taraqqiyot banki Yevropa ittifoqi va AQSh g‘aznachiligi ekspertlari yordam beradi.
