Online-maktab davom ettiriladi: Yozda ingliz tili va zamonaviy kasblar bo‘yicha darslar tashkil etiladi

2019-2020 o‘quv yilida mamlakatimizda 9942 ta maktabda 6,12 million o‘quvchi tahsil oldi.

Koronavirus pandemiyasi bilan bog‘liq mamlakatimizdagi vaziyat tufayli o‘quv yilining to‘rtinchi choragini masofadan tashkil qilishga to‘g‘ri keldi. Uchta telekanalda tashkil etilgan videodarslarda 200 nafardan ortiq pedagog 3900 dan ziyod darslar tayyorlab, efirga uzatdi.

Online-maktab loyihasi davom ettiriladi. Yozda telekanallar orqali o‘quvchilarga ingliz tili va zamonaviy kasb hamda ko‘nikmalar bo‘yicha bilim beradigan darslarni namoyish etish rejalashtirilgan.

Bu haqda AOKA shtabida o‘tkazilgan brifingda Xalq ta’limi vazirligi boshqarma boshlig‘i Erkin Murodov ma’lum qildi.

Ma’lumot uchun: 2019-2020 o‘quv yili natijalariga ko‘ra, 9-sinfni jami 490 mingga yaqin va 11-sinfni 451,3 mingdan ziyod o‘quvchi bitirdi.

Bitiruvchilar 15 iyunga qadar chop etilgan attestat (shahodatnoma)larning elektron shaklini (skaner) oladi.