Samarqandda odob-axloq qoidalariga rioya qilmagan o‘qituvchiga intizomiy jazo chorasi qo‘llanildi
Joriy yilning 15 aprel kuni ijtimoiy tarmoqlarda Samarqand shahridagi 35-umumta’lim maktabining 9-“B” sinf o‘quvchisi N.A.ning otasi D.A. tomonidan maktabning informatika fani o‘qituvchisi M.J.ning 9-“B” sinf o‘quvchilari ishtirokidagi telegram guruhida pedagogik etikaga mos kelmaydigan so‘zlardan foydalanayotgani to‘g‘risida shikoyat qilgani aks etgan ma’lumot tarqaldi.
Ushbu holat yuzasidan Samarqand shahar xalq ta’limi bo‘limi mas’ul xodimlari hamda bo‘lim tasarrufidagi 35-umumta’lim maktabi direktori Z.Salaxova ishtirokida o‘rganish ishlari olib borildi.
Bugungi kunda maktabda jami 63 ta sinf bo‘lib, ularning barchasida telegram ijtimoiy tarmog‘ida sinf rahbarlari va ota-onalar ishtirokida guruhlar tuzilgan. Shuningdek, maktabdagi ba’zi o‘qituvchilar o‘zi dars berayotgan fanlardan sinflardagi o‘quvchilar bilimini baholab borishda qulayligini inobatga olib, alohida guruhlar tashkil etgan.
Jumladan, maktabda 2019 yilda ish faoliyatini boshlagan, ayni paytda o‘quvchilarga informatika fanidan dars berib kelayotgan M.J. ham o‘z fanidan 9-sinflar uchun xuddi shunday telegramda o‘quvchilar ishtirokida guruh tashkil etgan.
Masofadan faoliyati davomida o‘qituvchi M.J. 9-“B” sinf uchun tashkil etgan telegram guruhidagi o‘quvchilar bilan munosabatida odob-axloq qoidalari va pedagogik etikaga rioya qilmagan.
O‘rganish ishlari davomida faoliyatida bunday xato va kamchiliklarga yo‘l qo‘ygan M.J.ga tushuntirish ishlari olib borildi hamda unga mehnat qonunchiligiga muvofiq intizomiy jazo chorasi qo‘llanildi.
O‘qituvchi M.J.ning xatti-harakatidan norozi bo‘lgan D.A. bilan telefon orqali bog‘lanib, ushbu holat yuzasidan olib borilgan ishlar bo‘yicha ma’lumot berildi. Muloqot davomida D.A. holat yuzasidan boshqa e’tirozi yo‘qligini bildirdi.
Maktab o‘qituvchilarining o‘quvchilar va ularning ota-onalari ishtirokidagi telegram guruhlarda masofadan olib borilayotgan faoliyatida bunday kamchiliklarga yo‘l qo‘ymasligi bo‘yicha ogohlantirildi.
Samarqand shahar xalq ta’limi bo‘limi tasarrufidagi 80 ta umumta’lim maktablarida direktor hamda o‘qituvchilarning masofadan ta’lim-tarbiya jarayonlarini tashkil etishda bu kabi kamchiliklarga yo‘l qo‘ymasligi, tizimda qat’iy nazorat olib borishi bo‘yicha topshiriqlar berildi.
