Oqdaryodagi savdo do‘konlarida yong‘in yuz berdi

Bugun, 9 iyun kuni soat 03:50 da Oqdaryo tumani «Loyish» mahalla fuqarolar yig‘ini, Amir Temur shoh ko‘chasida joylashgan savdo do‘konlarida yong‘in sodir bo‘layotganligi to‘g‘risida tuman favqulodda vaziyatlar bo‘limiga xabar kelib tushgan.

Yong‘in bo‘lgan joyga soat 03:56 da yetib borilib, soat 04:45 da qurshab olingan va yong‘in soat 05:37 da bartaraf etilgan. Yong‘inni bartaraf etishga 7 ta yong‘in-qutqaruv ekipaji hamda yordamchi ("KamAZ") jalb etilgan.

Dastlabki ma’lumotlarga ko‘ra, yong‘in natijasida mebel, xo‘jalik mollari va oziq-ovqat do‘konlarining taxminan 200 kv.m. maydonda shift, tom va jihozlari yonib, zararlangan.

Hodisa oqibatida tan jarohati olgan va halok bo‘lganlar yo‘q.

Hozirda yong‘inni kelib chiqish sababi va moddiy zarar miqdori aniqlanmoqda.