Past Darg‘omdagi “mushtumzo‘rlik” bo‘yicha jinoyat ishi qo‘zg‘atildi
Bugun ijtimoiy tarmoqlarda Past Darg‘om tumanidagi buyum bozorida fuqaroni bir necha kishi kaltaklagani aks etgan video tarqalgan edi. Ko‘p o‘tmay viloyat IIB tomonidan mazkur ish o‘rganilayotgani va jazo muqarrar bo‘lishi haqida bayonot berildi.
Ma’lum bo‘lishicha, mazkur holat bo‘yicha jinoyat ishi qo‘zg‘atilgan.
“2021 yil 24 noyabr kuni Past Darg‘om tumani “Qatorterak” mahallasida yashovchi A.B. tumandagi buyum bozorida o‘zining tanishi N.S.ni ko‘rib qolib, o‘zaro tortishib qolishi natijasida ular o‘rtasida janjal yuzaga kelgan.
Janjal davomida A.B. N.S.ni urib, unga tan jarohati yetkazgan.
Holat yuzasidan tuman IIB huzuridagi tergov bo‘limi tomonidan fuqaro A.B.ga nisbatan Jinoyat kodeksining 277-moddasi (bezorilik) 1-qismi bilan jinoyat ishi qo‘zg‘atilib, tergov harakatlari olib borilmoqda”, deyiladi IIB xabarida.
