Prezident Surxondaryoga jo‘nab ketdi
O‘zbekiston Respublikasi Prezidenti Shavkat Mirziyoyev Termiz shahrida bo‘ladigan Xalqaro baxshichilik san’ati festivalining ochilish marosimida ishtirok etish uchun 5 aprel kuni Surxondaryo viloyatiga jo‘nab ketdi.
Davlatimiz rahbarining 2018 yil 1 noyabrdagi "Xalqaro baxshichilik san’ati festivalini o‘tkazish to‘g‘risida"gi qarori ijrosi doirasida ilk bor o‘tkazilayotgan ushbu festival o‘zbek milliy baxshichilik va dostonchilik san’atining noyob namunalarini asrab-avaylash va rivojlantirish, keng targ‘ib qilish kabi ezgu maqsadlarga qaratilgan.
Xalqaro festivalda mamlakatimiz baxshichilik maktablari vakillari, san’at ixlosmandlari bilan birga, jahonning 80 dan ziyod davlatidan kelgan 300 dan ziyod mehmon ishtirok etadi.
