Qishning oxirgi oyida qanday ob-havo kutilmoqda? Mutaxassislar ma’lumot berdi
"O‘zgidromet" xabariga ko‘ra, fevral oyining o‘rtalarigacha O‘zbekistonda qish o‘z o‘rnini saqlab turadi, vaqti-vaqti bilan issiq va sovuq kunlar almashadi va oyning oxiriga kelib tekisliklarga bahor keladi. Biroq, bu har doim ham shunday bo‘lmaydi.
Ba’zida harorat tartibi bo‘yicha fevral oyining birinchi kunlaridan boshlab bahor boshlanishiga o‘xshaydi, ba’zan esa butun qish mavsumi uchun eng past harorat fevral oyiga to‘g‘ri keladi.
O‘tgan yil ham shunday bo‘lgan edi. Oyning boshidanoq respublika bo‘yicha juda iliq ob-havo kuzatildi. Fevral oyining o‘rtalariga kelib, havo harorati 23-28 daraja, janubda 32 daraja iliq qiymatlariga yetdi. Oyning oxiriga kelib, bizning iqlim uchun qattiq bo‘lgan sovuq keldi. Kechalari havo 10-12 daraja, ba’zi joylarda 15 daraja sovuq bo‘ldi.
O‘zbekistonda so‘nggi yillarda eng sovuq fevral oyi 2014 yilda kuzatilgan, oyning o‘rtacha harorati me’yordan 5-7 darajaga past, oyning birinchi yarmida esa me’yordan umuman 12-15 darajaga past bo‘lgan. Eng sovuq davrda havo harorati kechalari 14-17 daraja sovuqqacha, kunduz kunlari esa 7-10 daraja sovuqqacha pasaygan. 2014 yilning fevral oyida yog‘ingarchilik kam bo‘lgan, ammo oyning birinchi yarmida yog‘ingarchilik faqat qor ko‘rinishida yoqqan.
2016 yilning fevral oyi eng issiq bo‘lgan. Havo harorati 23-28 daraja iliqqacha ko‘tarilgan. Fevral oyi nafaqat issiq, balki eng quruq bo‘lgan. Yog‘ingarchilik anomal kam miqdorda yoqqan, Toshkentda me’yordan atigi 3 foizni tashkil etgan.
Ushbu yilning fevral oyi nisbatan iliq ob-havo bilan boshlanadi.
Oyning birinchi o‘n kunligida kechalari harorat 0-5 daraja iliq, ba’zi joylarda 2 daraja sovuq atrofida bo‘ladi, kunduz kunlari harorat 6-8 daraja iliqdan 12-14 daraja iliqqacha o‘zgarib turadi.
5 fevralda shimolda, 6 fevralda O‘zbekistonning qolgan hududlarida asosan yomg‘ir ko‘rinishidagi yog‘ingarchilik bo‘ladi. Respublika bo‘yicha ba’zi joylarda birinchi o‘n kunlikning eng oxirida ham biroz yog‘ingarchilik bo‘lishi mumkin.
Keyinchalik O‘zgidrometning dastlabki bahosiga ko‘ra, havo harorati kechalari 0-5 daraja iliqdan 0-5 daraja sovuqqacha, shimolda 8-13 daraja sovuqqacha, kunduz kunlari 10-15 daraja iliqdan 3-8 daraja iliqqacha o‘zgarib turadi. Hududlarning katta qismida yomg‘ir va qor ko‘rinishidagi yog‘ingarchilik me’yordan kam bo‘lishi kutilmoqda.
