Samarqand davlat universitetida 17 ta yangi yo‘nalish ochildi, endi 2980 nafar talaba qabul qilinadi

Samarqand davlat universitetiga abituriyentlarni ro‘yxatdan o‘tkazish  qizg‘in davom etmoqda.

– Yangi o‘quv yili uchun abituriyentlar bakalavrlar tayyorlash bo‘yicha 50 ta yo‘nalish uchun ro‘yxatdan o‘tmoqda, – deydi universitet qabul komissiyasi mas’ul kotibi R.Mirzayev. – O‘tgan yili abituriyentlar o‘z xohishiga ko‘ra mavjud 34 ta yo‘nalishdan biriga hujjat topshirgan edi. Ya’ni, bitta yo‘nalish kamaydi va 17 ta yangi yo‘nalish turi qo‘shildi. Magistrlar tayyorlash uchun ham joriy yildan boshlab 50 ta yo‘nalish tashkil etildi. Shunga ko‘ra, universitetga 2019-2020 o‘quv yilida bakalavrlar tayyorlash uchun 2980 nafar abituriyent talabalikka tavsiya etiladi. Magistrlar tayyorlash bo‘yicha esa 322 nafar kishi qabul qilinadi.

Test sinovlaridan muvaffaqiyatli o‘tib, 2019-2020 o‘quv yilidan boshlab mazkur oliygohda o‘qishni boshlaydigan yigit-qizlarning 645 nafari grant hamda 2335 nafari to‘lov-kontrakt asosida bakalavrlar tayyorlash yo‘nalishida tahsil oladi. O‘qishni magistraturada davom ettiradiganlarning 197 nafari grant, 125 nafari esa to‘lov-kontrakt asosida o‘qiydi.

– Filologiya fakultetining o‘zbek tili yo‘nalishida o‘qish uchun ro‘yxatdan o‘tdim, – deydi urgutlik J.Fatullayev. – O‘tgan yili ham kollejni tugatib, shu yo‘nalishga hujjat topshirgandim, ammo omadim kelmagandi. Biroq bu yil katta umid bilan harakat qilyapman. Bu yil hujjatbozlikning kamaygani juda qulaylik tug‘dirdi. Qolaversa, bir nechta joyda abituriyentlarni ro‘yxatdan o‘tkazish amalga oshirilayotgani bois hammaning hujjati osongina rasmiylashtirilyapti.

Universitetda sirtqi ta’lim shaklining 14 ta yo‘nalish (oldingi yili 11 ta edi)ga abituriyentlarni qabul qilishga tayyorgarlik ishlari davom etmoqda. Mazkur ta’lim shaklida yangi o‘quv yili uchun 900 nafar talabani qabul qilish rejalashtirilgan bo‘lib, abituriyentlardan hujjat qabul qilish joriy yilning 1 iyulidan 30 iyuliga qadar davom etadi. Shuningdek, kechki ta’lim shakliga ham 260 ta o‘rin bo‘lib, abituriyentlar 5 ta yo‘nalishdan biriga hujjat topshirishi mumkin. O‘tgan o‘quv yilida mazkur ta’lim shakliga 200 nafar abituriyent 4 ta yo‘nalish bo‘yicha qabul qilingan edi.

P/S: Samarqand davlat universitetida ochilgan 17 ta yangi yo‘nalish bo‘yicha batafsil xabar beramiz. Saytimizni kuzatib boring. 

Abdujabbor Po‘latov.