Samarqand shahrida avtomashinani olib qochgan shaxslar qo‘lga olindi

Shu yil 4 iyun kuni noma’lum shaxslar Samarqand shahar Jayxun ko‘chasida qarovsiz qoldirilgan 24 yoshli Z.I.ga tegishli “VAZ-2106” rusumli avtomashinani haydab qochganlar. Bu haqda O‘zbekiston Respublikasi IIV Jamoatchilik va OAV bilan aloqalar boshqarmasi xabar bermoqda.

Avtomashina Samarqand shahar Xishrav qo‘rg‘onidan texnik soz holda topilgan. Mashina ko‘zdan kechirilganda uning old va orqa tomon davlat raqamlari hamda 2 dona kalonkasi yo‘qligi aniqlangan.

Ko‘rilgan choralar natijasida ushbu jinoyatni Samarqand shahar Gasparali ko‘chasida yashovchi 28 yoshli A.A. va Beruniy ko‘chasida yashovchi 20 yoshli Sh.Q.lar sodir etganliklari aniqlanib, gumondorlar ushlangan. Holat yuzasidan jinoyat ishi qo‘zg‘atilib, tergov harakatlari olib borilmoqda.