Samarqandda yana 12 bemor koronavirusdan tuzaldi
Poytaxtimizdagi Virusologiya ilmiy-tekshirish instituti klinikasida 13 nafar, Samarqand viloyatida 12 nafar hamda Navoiy viloyatida 8 nafar, jami 33 nafar bemor butunlay sog‘aydi va reabilitatsiyaga kuzatildi.
Endilikda Toshkent shahrida tuzalganlar 919 nafarga yetdi, davolanayotganlar esa 353 nafarni tashkil etmoqda. Samarqand viloyatida esa sog‘ayganlar 230 nafarga yetib, davolanayotganlar 94 nafar bo‘lib turibdi. Navoiy viloyatida darddan forig‘ bo‘lganlar 10 nafar, davolanayotgan esa 78 nafarni tashkil etmoqda.
Aholi orasidan koronavirus infeksiyasi aniqlanayotgan fuqarolar ham aynan ushbu uchta hudud: Navoiy va Samarqand viloyatlari hamda Toshkent shahri hissasiga to‘g‘ri kelmoqda.
Shu bois, ushbu hududlarda koronavirus infeksiyasi tarqalishining oldini olish hamda bemorlarni samarali davolash borasida qat’iy choralar ko‘rilmoqda.
Shunday qilib, bugun hozirga qadar 33 nafar bemor tuzalib, mamlakatimiz bo‘ylab koronavirus infeksiyasidan butunlay sog‘ayganlar 2565 nafarga yetdi.
Hozirda yurtimizda koronavirus aniqlanganlar soni 3132 nafarni tashkil qilib, sog‘aygan va vafot etganlardan tashqari, jami 554 nafar bemor davolanmoqda.
Sog‘liqni saqlash vazirligi
Jamoatchilik bilan aloqalar bo‘limi.
