"Sardoba" ishi bo‘yicha yopiq sud jarayoni boshlandi

21 dekabr kuni Oliy sudning Jinoyat ishlari bo‘yicha sudlov hay’ati tomonidan sudlanuvchilar M.Xolmatov (“O‘zbekiston temir yo‘llari” AJ “Gidrotexnik inshootlar qurish direksiyasi” boshlig‘i lavozimida ishlagan) va boshqalar (jami 17 kishi)ga nisbatan jinoyat ishini ko‘rib chiqish bo‘yicha yopiq sud jarayoni boshlandi.

Ushbu jinoyat ishi bevosita davlat sirlari bilan bog‘liq bo‘lganligi sababli Jinoyat-protsessual kodeksining 19-moddasi 1-qismi talablariga muvofiq yopiq tarzda ko‘rilayapti.

Sudlanuvchilar Jinoyat kodeksining 167-moddasi (o‘zlashtirish yoki rastrata yo‘li bilan talon-toroj qilish), 203-moddasi (suv yoki suv havzalaridan foydalanish shartlarini buzish), 205-moddasi (hokimiyat yoki mansab vakolatini suiiste’mol qilish), 207-moddasi (mansabga sovuqqonlik bilan qarash), 209-moddasi (mansab soxtakorligi) va 258-moddasi (tog‘-kon, qurilish yoki portlatish ishlari xavfsizligi qoidalarini buzish)da nazarda tutilgan jinoyatlarni sodir etganlikda ayblanmoqda.

Oliy sud matbuot xizmati sud jarayoni davom etayotgani, ishni ko‘rib chiqish natijalari bo‘yicha alohida bayonot berilishi haqida ma’lum qilgan.a