Savdo majmuasidagi 18 ta do‘kon yonib ketdi
Surxondaryo viloyati Denov tumanidagi savdo majmualarining birida 24 fevral kuni soat 05:37 da yong‘in sodir bo‘ldi.
FVV matbuot xizmati xabariga ko‘ra, savdo majmuasi Bahoriston mahallasi, Mustaqillik ko‘chasida joylashgan bo‘lib, yong‘in 2 qavatli binoning 2-qavatida yuz bergan.
Oqibatda 18 ta savdo ob’yektlari umumiy maydonining 630 metr kvadrat qismi yong‘indan zararlangan.
Voqea joyiga Surxondaryo viloyati favqulodda vaziyatlar boshqarmasining 7 ta yong‘in-qutqaruv ekipaji yetib borgan. Qutqaruvchilar olib borgan tezkor harakatlar natijasida binoning 1 680 metr kavadrat qismi yong‘indan saqlab qolingan.
Tan jarohati olganlar yo‘q. Yong‘in sababi va moddiy zarar aniqlanmoqda.
