Sen baxtli g‘amdirsan, dardli huzursan

Mustaqilman, uchib yuribman

Oyog‘imga osilgan toshlarni otdim,
Yemadim, it tekkan oshlarni otdim,
Ko‘zimdan sidirib yoshlarni otdim,
Mustaqilman, uchib yuribman.
 
Salom setoralar, sarxush havolar,
Sevgilar assalom, salom vafolar,
Salom sayyoralar, salom samolar 
Mustaqilman, uchib yuribman.
 
Salom saodatim, salom Humo qush,
Salom haqiqatga aylangan oq tush,
Bamisoli oqqush, misoli Haqqush,
Mustaqilman, uchib yuribman.
 
Saodat qasrida najot meniki,
Parizod meningdir, hurzot meniki,
Zanjirni sindirgan qanot meniki,
Mustaqilman, uchib yuribman.
 
Rostdan ham ushbu baxt o‘zimnikimi?
Laylivash, jayronqarash ko‘zimnikimi?
Tangriga shukurlar so‘zimnikimi?
Mustaqilman, uchib yuribman.
 
She’rim zeboligim namoyishlidir,
Ta’zimim, tavofim azmoyishlidir,
Kulgim, tabassumim gulroyishlidir,
Mustaqilman, uchib yuribman.
 
Sayroqi qushlarga sirdosh turibman,
Munavvar tonglarga nurdosh turibman,
Onhazrat qizidek baxtlar ko‘ribman,
Mustaqilman, uchib yuribman.
 
Orqaga – qorong‘u xosga qaytmasman,
Dorlarga - ul so‘nggi nafasga qaytmasman,
Qafasga qaytmasman, qafasga qaytmasman.
Mustaqilman, uchib yuribman.
 
Zulfiya MO‘MINOVA.
***

QIShLOQ

Husningga hayratim oshib, qaytadan –
Rasmingni yurakka chizgim keladi.
Qaynoq quchog‘ingdan ketolmay, vatan –
Olis qishloqlarni kezgim keladi.

Mo‘’jizaga  do‘nar  bunda  har  fasl,
Ko‘zlar qamashadi tarovatidan.
Bahori beqiyos, kuzi serhosil,
Qish qo‘rqar yozining haroratidan.

Bepoyon dalalar, purviqor tog‘lar
Dilimizga solar vatan rasmini.
Suv yoqalab bunyod bo‘lgan qishloqlar,
Yerga mehr bermoq – hayot mazmuni.

Mudom ezgulikka ochiq eshigi,
Mehr isi anqir quchoqlaridan.
Dunyoga taralar Vatan qo‘shig‘i –
Mening ozod yurtim qishloqlaridan!

Orif TO‘XTASh.

***

VATAN MADHI

Onamday u, 

   aziz naqadar,

Ko‘zim nuri,

    qarog‘im - Vatan.

Kunduz oftob, 

    oydin kechalar,

Fonusim - Oy,

    chirog‘im - Vatan.

 

Bir jismman,

   u tanamda jon,

Qoshim , ko‘zim, 

   qabog‘im - Vatan.

Tomirimda

   jo‘shib oqqanim,

Qonim , tafti

    qaynog‘im - Vatan.

 

Orzulari

   osmon qadar keng,

Chashmadirman

   irmog‘im - Vatan.

Tomchi ersam

    u ummonga teng,

Daryo ersam,

    qirg‘og‘im - Vatan.

 

Har toshining

   tinglay arzini,

Qo‘limdagi

   qayrog‘im - Vatan.

O‘zbekiston

    obod gulshanim,

Gullayotgan

    gulbog‘im - Vatan.

 

Sarhadiga

   yovdek kelsa kim,

Qalqoniman,

   yarog‘im - Vatan!

Ro‘zi Mahshar-

    toki manzilim,

Qo‘nim topar

    tuprog‘im - Vatan!..

Shahriddin UMIROV.

***

VATAN

"...Qishlarida shivirlar bahor”

OYBEK.

Sen faqat moddamas, yorug‘ shuursan
His, ohang, rang, quvonch, ahddirsan vatan.


Sen baxtli g‘amdirsan, dardli huzursan,
Xo‘rlik tuning o‘tgan marddirsan vatan.


U kunlar soyadir sen nursan, tongsan,
Tafakkur va shukur sha’nli bir ongsan.


Ongladim deb bo‘lmas, tongladim minglab,
Buyuk kuysan, bo‘lmas beparvo tinglab.


Oqiga yashili qorishgan Vatan,
Qishi bahor bilan yorishgan Vatan.

Yo‘ldosh EShBEK.

***

Taniqli shoir Yo‘ldosh Eshbek bugun 74 yoshga to‘ldi. U 1950 yil 1 sentyabrda Ishtixon tumanida tavallud topdi.

Dastlabki she’rlar to‘plami «Sog‘inib yashayman» nomi bilan 1981 yilda chop etildi. Shundan keyin shoirning «Yuksak daraxtlar», «Moviy turnalar», «Yaxshilikka qarayman», «Daraxtlar ertagi», «Hayot chechagi», «Mangu masofa» kabi she’riy to‘plamlari nashr etilgan.

Imom G‘azzoliyning «Ey farzand», Ahmad Lutfiyning «O‘gay ona», «Hazrati Ali», Fotima Temurning «Ko‘ngil do‘stlari» («Tazkirat ul-avliyo»), Amina Shank o‘g‘lining «Vijdon azobi»ni hamda O‘ljas Sulaymon («Sopol kitob») va boshqa adiblarning asarlarini o‘zbek tiliga tarjima qilgan.

1998 yilda «Shuhrat» medali bilan taqdirlangan.

Kanalga qo'shiling   So'nggi yangiliklar telegram kanalimizda  

So'nggi yangiliklar