Sohibqiron Amir Temur mardlik, jasorat, vatanparvarlik timsoli mujassamlashgan buyuk siymo
O‘zLiDeP Samarqand viloyat Kengashi, Respublika ma’naviyat va ma’rifat markazi Tayloq tuman bo‘limi hamkorligida O‘zbekiston Respublikasi Milliy gvardiyasi Tayloq tuman bo‘linmasida Buyuk sarkarda Sohibqiron Amir Temur tavalludining 683 yilligiga bag‘ishlab tadbir uyushtirildi.
Unda O‘zLiDeP Tayloq tuman Kengashi raisi, Respublika ma’naviyat va ma’rifat markazi tuman bo‘limi rahbari Ziyodullo Avazov so‘zga chiqib, buyuk bobokalonimiz Amir Temur hayoti va faoliyati haqida yig‘ilganlarga gapirib berdi.
- Sohibqiron Amir Temur deganda, mardlik, jasorat, vatanparvarlik timsoli mujassamlashgan tarixiy qahramon gavdalanadi. U nafaqat sarkarda, balki odil podshoh, buyuk me’mor shuningdek, o‘z davrida madaniyat va ma’rifat rivojiga hissa qo‘shgan buyuk arbob hisoblanadi. Sohibqiron davrida Movarounnahrda hunarmandchilik tadbirkorlik keng rivojlangan. Amir Temurning “Ishbilarmon, mardlik va shijoat sohibi, azmi qat’iy, tadbirkor va hushyor bir kishi ming-minglab tadbirsiz, loqayd kishilardan yaxshidir”- degan so‘zlari bugungi kunning eng dolzarb shiorlaridan biriga aylangan. Uning bosib o‘tgan hayot yo‘lini o‘rganish har bir fuqaroning burchi deb bilanman, - deydi Z.Avazov.
Tadbirda shuningdek , O‘zLiDeP Samarqand viloyat Kengashi tomonidan Milliy Gvardiyaning Tayloq tuman bo‘linmasi kutubxonasiga kitoblar jamlanmasi taqdim etildi.
- Bugun mamlakatimizda kitobga va kitobxonlikka katta e’tibor qaratilmoqda. Yurtboshimiz tomonidan 2017 yil 12 yanvardagi “Kitob mahsulotlarini chop etish va tarqatish tizimini rivojlantirish, kitob mutolaasi va kitobxonlik madaniyatini oshirish hamda targ‘ibot qilish bo‘yicha komissiya tuzish to‘g‘risida”gi qaroridan so‘ng yurtimizda kitobga bo‘lgan munosabat o‘zgardi. Bugungi uchrashuvda harbiylarimizga partiyamiz tomonidan Buyuk sarkarda Amir Temur hayoti va faoliyatiga bag‘ishlangan kitoblar sovg‘a qilindi. Ushbu kitoblar yoshlar uchun ma’naviy ozuqa bo‘libgina qolmasdan, ularning hayot yo‘llarini yoritishda shamchiroq bo‘lib xizmat qiladi, - deydi O‘zLiDeP Samarqand viloyat Kengashi bo‘lim mudiri Nasiba Mo‘minova.
Baxtigul Qarshiyeva,
O‘zLiDeP Samarqand viloyat Kengashi matbuot kotibi.
