Бугун Самарқанд шаҳридаги Ибн Сино кўчасининг бир қисмида транспорт ҳаракати вақтинча чекланади
Шаҳар ҳокимлиги хабарига кўра, бугун, 21 декабрь куни Самарқанд шаҳридаги Ибн Сино кўчаси 17-уйда School 21 бепул IT мактабининг биринчи кампуси очилади.
Муассасанинг очилиши муносабати билан соат 14:00 дан 19:00 гача Рудакий ва Ибн Сино кўчасининг оралиқ қисмида жойлашган "Олимпия" стадионида "Мусиқа билан дастурланг" номли концерт дастури ҳам ташкил этилади.
Шу муносабат билан Самарқанд шаҳар ҳокими фармойиш асосида ҳудудда ҳаракат хавфсизлигини таъминлаш мақсадида Ибн Сино кўчасининг Даҳбед кўчаси билан кесишмасидан Бўстонсарой ва Рудакий кўчаси кесишмасигача бўлган қисмида тадбир ўтказиладиган вақтда транспорт воситаларининг ҳаракати чекланади.
Эслатиб ўтамиз, ушбу вақтда Рудакий кўчасининг Бўстонсарой кўчаси билан кесишмасида жойлашган тоннел ости ва усти бўйлаб транспорт воситаларининг ҳаракати давом этаверади, дейилади хабарда.
