Путин урушни тугатишни истамоқда: тинчлик таклифи музокара столида
Россия президенти Владимир Путин Украинадаги можарони бартараф этиш ниятида эканини АҚШ президентининг махсус вакили Стив Уиткофф Fox News телеканалига билдирган.
«Менимча, Путин мулоқотга киришиш учун самимий саъй-ҳаракат қилди. Буни у Аляска саммитида ҳам очиқ намоён этди. Бироқ бу жуда мураккаб можаро», деди Уиткофф.
Унинг сўзларига кўра, шу ҳафтада Нью-Йоркда Украина вакиллари билан учрашув режалаштирилган. Бундан аввал Вашингтондаги ҳукумат йиғилишида Уиткофф АҚШ йил охиригача Украинадаги можарони тугатиш ниятида эканини айтди.
6 август куни Уиткофф Москвага расмий ташриф билан келиб, Кремлда Путин билан уч соат давом этган учрашув ўтказган эди. Бу – йил бошидан бери уларнинг бешинчи мулоқоти бўлди.
Аввалроқ, Трамп Россия ва Украина ўртасидаги можарони «шахсий характерга эга» деб атаган ва уни тўхтатиш ниятида эканини билдирган эди. Оқ уйда Зеленский ва Европа етакчилари иштирокидаги саммитдан кейин Трамп Путин ва Зеленский учрашуви тайёргарлиги бошланганини эълон қилди.
Россия ТИВ раҳбари Сергей Лавров ҳам Путин Зеленский билан учрашишга тайёрлигини, бироқ фақат «президентлик кун тартиби» мавжуд бўлган тақдирдагина бундай учрашув ўтказилиши мумкинлигини таъкидлади. Бироқ ҳозирча бундай кун тартибидан дарак йўқ.
АҚШ президенти Дональд Трамп, агар Украинадаги урушни бартараф этишда силжиш бўлмаса, Вашингтон Москвага нисбатан «иқтисодий уруш» бошлашга тайёрлигини билдирди. Трамп фақат иқтисодий чораларни кўриб чиқишини таъкидлаб, «Биз Учинчи жаҳон урушига йўл қўймоқчи эмасмиз», деди. Трампнинг айтишича, АҚШ санкция ва божхона чораларини фақат Россияга эмас, балки Украинага қарши ҳам жорий этиши мумкин. «Зеленский ҳам мутлақ бегуноҳ эмас, танго рақси учун икки киши керак», деди Трамп. «Украина ғалаба қозонаман деб ўйлади. Лекин ўзингиздан 15 баробар катта давлатни енгиб бўлмайди», дея қўшимча қилди у.
Ўз навбатида Германия канцлери Мерц Москва Зеленский билан учрашувдан бош тортса, Россияга қарши санкциялар жорий этилиши мумкинлигини билдирди.
Томонларнинг кейинги учрашуви Туркияда бўлиши мумкин.
Гулнора Холдорова тайёрлади.
