Bugun Nodirbek amaldagi jahon chempioni Magnus Karlsenga qarshi dona suradi
Polsha poytaxti Varshava shahrida shaxmatning blits va rapid yo‘nalishi bo‘yicha FIDE jahon chempionati davom etmoqda.
Umumiy mukofot jamg‘armasi 1 million dollarni tashkil qiluvchi ushbu nufuzli musobaqada yosh grossmeysterlarimiz Nodirbek Abdusattorov, Javohir Sindorov, Shamsiddin va Jahongir Vohidovlar o‘z mahoratlarini namoyish etishyapti.
E’tiborlisi, 17 yoshli grossmeysterimiz Nodirbek Abdusattorov 9-turdan so‘ng 7 ochko jamg‘argan holda qo‘shimcha koeffitsentlarga ko‘ra ikkinchi o‘rinni egallab turibdi. Nodirbekdan yarim ochko ko‘p jamg‘argan amaldagi jahon chempioni, norvegiyalik grossmeyster Magnus Karlsen chempionatda peshqadamlik qilyapti.
Bugun 10-turda Nodirbek Abdusattorov oq donalarda Magnus Karlsenga qarshi bahs olib boradi. Kecha Nodirbek qora donalarda o‘ynashiga qaramay, isroillik mashhur grossmeyter Boris Gelfandni mag‘lubiyatga uchratdi.
