Buxoroda yuz bergan tabiiy ofat oqibatlarini bartaraf etish uchun davlat byudjetidan 100 milliard so‘m ajratiladi
Buxoro viloyatida yuz bergan tabiiy ofat oqibatlarini bartaraf etish bo‘yicha chora-tadbirlar haqida Prezident farmoyishi qabul qilindi. Bu haqda «Yuksalish» umummilliy harakati xabar berdi.
27−28 aprel kunlari Buxoro viloyatida yuz bergan tabiiy ofatdan zarar ko‘rgan aholiga har tomonlama tezkor yordam ko‘rsatish maqsadida Hukumat komissiyasi tashkil etildi va unga quyidagi vazifalar yuklatilgan:
- yetkazilgan zarar va yo‘qotishlar miqdorini aniqlash va baholash;
- fuqarolarga vaqtincha turar joy, oziq-ovqat, tibbiy xizmat va boshqa yordamlar ko‘rsatish;
- ijtimoiy-iqtisodiy, muhandislik, transport va energetika infratuzilmasini va boshqa hayotiy muhim ob’yektlar va tizimlarni ishchanlik holatiga keltirish;
- qurilish-tiklash ishlariga zarur bo‘ladigan qurilish materiallarini miqdorini aniqlash va ularni yetkazish;
- qishloq va o‘rmon xo‘jaligiga yetkazilgan zararni va yo‘qotishlar o‘rnini qoplash, irrigatsiya va melioratsiya tarmoqlarini tiklash;
- qisqa muddatlarda nobud bo‘lgan g‘alla va paxta maydonlariga boshqa turdagi qishloq xo‘jaligi mahsulotlarini ekish.
Hukumat komissiyasiga 3 kun muddatda tabiiy ofat oqibatlarini bartaraf etish bo‘yicha kompleks chora-tadbirlar rejasini ishlab chiqish topshirilgan.
Yuz bergan tabiiy ofat oqibatlarini bartaraf etish ishlariga davlat byudjetidan 100 milliard so‘m ajratiladi.
Farmoyishga ko‘ra, paxta-to‘qimachilik klasterlari va fermer xo‘jaliklari tomonidan zarar yetgan g‘o‘za maydonlariga qilingan xarajatlar va g‘alladan olinmaydigan hosil o‘rnini qoplash choralari ko‘riladi.
Komissiya 10 kun muddatda Olot tumani aholisiga qulay shart-sharoitlar yaratish, tuman markazini yana obod qilish maqsadida ko‘p qavatli uy-joylar, madaniy-maishiy hamda boshqa ijtimoiy ob’yektlar qurish bo‘yicha taklif ishlab chiqadi. Shuningdek, 2 hafta muddatda Olot va Qorako‘l tumanlarida yirik investitsiya loyihalarini amalga oshirish yuzasidan taklif ishlab chiqiladi.
Barcha chora-tadbirlar koronavirus infeksiyasi tarqalishi munosabati bilan joriy qilingan karantin tartib-qoidalariga qat’iy rioya etilgan holda amalga oshirilishi belgilangan.
