Chelak ko‘p tarmoqli markaziy poliklinikasida issiqlik tizimi ishlamaydi
Bu haqda bugun viloyat hokimligida bo‘lib o‘tgan apparat yig‘ilishida aytib o‘tilgan. Qayd etilishicha, tumanda 3 ta xususiy uy-joy mulkdorlari shirkatining birortasida ahvol yaxshi emas.
Misol uchun, “Payariq Faravon” XUJMShga qarashli uylarning kirish yo‘laklarida elektr shitlar ochiq va himoyalanmagan, irrigatsiya tizimi chiqindilarga to‘lgan, shirkat hududi obodonlashtirilmagan, chiqindi tashlash hududi obodonlashtirilmagan, yo‘llari ta’mirtalab, yerto‘la chiqindiga to‘la, yoritish tizimi yo‘q.
“Payariq Xumo” XUJMShga qarashli uylarning irrigatsiya tizimi chiqindilarga to‘lib qolgan, yoritish tizimlari mavjud emas.
“Chelak Obod Faravon” XUJMShga yoritish tizimi mavjud emas, shirkat ichki yo‘llar yaroqsiz holda, shirkat hududi obodonlashtirilmagan.
Tumanda tabiiy gaz bilan ta’minlash ishlari ham yetarli darajada tashkil etilmagan. Xususan, O‘zbekiston mahallasida iste’molchilarni tabiiy gaz bilan ta’minlash uchun o‘rnatilgan o‘rta bosimli gaz taqsimlash qurilmasida profilaktika ishlari bajarilmagan. Shuningdek, manometrlar o‘rnatilgan bo‘lsa-da, ishlamaydi, nazorat daftarchasi yo‘q.
Xuddi shunday kamchiliklar Madaniyat mahallasidagi va Mirzo Ulug‘bek mahallasidagi gaz taqsimlash qurilmalarida ham aniqlangan.
Tumandagi 25-umumiy o‘rta ta’lim maktabidagi 4 ta qozonxonaga dud bo‘ronlar o‘rnatilmagan, maktab binosi tom qismining ba’zi joylariga tarnovlar o‘rnatilmagan.
14-maktabgacha ta’lim tashkiloti mutlaqo kuz-qish mavsumiga tayyor emas. Kamiga bolalar bog‘chasi binosi ta’mirtalab, xonalarda qo‘lbola isitish pechlaridan foydalanmoqda, yong‘in xavfsizligi talablari ham bajarilmagan.
Tuman tibbiyot birlashmasi Chelak ko‘p tarmoqli markaziy poliklinikasida joriy ta’mirlash ishlari bajarilmagan, issiqlik tizimi ishlamaydi, yoritish lampalarining yarmi ishlamaydi.
Tumandagi “Bolta” qishloq vrachlik punktida (QVP) joriy ta’mirlash ishlari bajarilmagan, issiqlik tizimi ishlamaydi, yoritish lampalari ma’nan eskirgan.
Xuddi shunday kamchiliklar “Vali” QVP, “Choshtepa” va “Allayorquduq” qishloq vrachlik punktlarida ham aniqlangan.
