Futbol-2023: Yilning eng yaxshilari taqdirlandi

Samarqandda o‘tgan yilda futbol bo‘yicha o‘tkazilgan respublika hamda viloyat musobaqalarida g‘olib va sovrindor bo‘lgan futbolchi va murabbiylarni taqdirlash marosimi bo‘lib o‘tdi.

Futbol bo‘yicha viloyat birinchiligi, “Bolalar ligasi”, “Yoshlar ligasi”, ommaviy, havaskor va professinal futbol jamolari hamda respublika musobaqalarida g‘olib bo‘lgan futbolchi va ularning murabbiylariga, shuningdek, Samarqand futboli rivojiga munosib hissa qo‘shib kelayotgan mas’ullarga viloyat hokimining tashakkurnomasi, viloyat futbol assotsiatsiyasining faxriy yorliq, kubok va medallari topshirildi.

- Jamoamiz qizlarining sport bilan muntazam shug‘ullanishi natijasida o‘tgan yil mini futbol bo‘yicha “Davlat xavfsizlik xizmati kubogi”ning respublika bosqichida g‘olib bo‘ldik, - deydi Jomboy tumani No‘sh mahallasining “Nafis” qizlar futbol jamoasi murabbiyi Gulhayo Tojinurova. - Joriy yilda ham tumanimizda sportga qiziquvchi yoshlarni jamoamizga jalb qilib, musobaqalarda ishtirok etamiz va bundan-da kattaroq yutuqlarni qo‘lga kiritish uchun harakat qilamiz.

Tadbirda viloyat hokimining o‘rinbosari R.Qobilov ishtirok etdi.