Osiyo Taraqqiyot Bankining 59-yillik yig‘ilishi Samarqandda bo‘lib o‘tadi
2010 yilda Toshkent shahrida OTBning 43-yillik yig‘ilishi muvaffaqiyatli o‘tkazilgandan so‘ng O‘zbekiston Osiyo Taraqqiyot Banki (OTB)ning yillik yig‘ilishiga ikkinchi marta mezbonlik qiladigan bo‘ldi. Ya’ni, 2026 yilning 3-6 may kunlari OTBning 59-yillik yig‘ilishi tarixiy Samarqand shahrida bo‘lib o‘tadi.
Bu haqda kecha, 7 may kuni Italiyaning Milan shahrida OTB tomonidan tashkil etilgan xalqaro forumda ma’lum qilindi.
OTB 1966 yilda tashkil etilgan bo‘lib, unga 69 mamlakat a’zo bo‘lgan. Ularning 50 tasi mintaqada joylashgan.
Yillik yig‘ilish OTBga 69 ta a’zo davlatdan Boshqaruvchilar uchun Osiyo va Tinch okeani mintaqasi oldida turgan rivojlanish masalalari va muammolarni ko‘rib chiqish uchun asosiy imkoniyatdir. Yig‘ilish ishida muntazam ravishda bir necha ming ishtirokchi, jumladan, moliya vazirlari, markaziy bank rahbarlari, yuqori martabali hukumat amaldorlari, xususiy sektor vakillari, xalqaro tashkilotlar, fuqarolik jamiyati va ommaviy axborot vositalari vakillari ishtirok etadi.
“Ishonchim komilki, 2026 yilgi yillik yig‘ilish muloqot va hamkorlik munosabatlarini mustahkamlash uchun ilhomlantiruvchi platforma bo‘lib xizmat qiladi va mintaqaning ko‘plab o‘ziga xos jihatlarini muhokama qilish uchun imkon yaratadi”, - dedi OTB prezidenti Masato Kanda.
OTB O‘zbekistonning rivojlanish bo‘yicha eng yirik hamkorlaridan biri bo‘lib, so‘nggi besh yil ichida yurtimiz iqtisodiyotiga 5,41 milliard AQSh dollaridan ortiq mablag‘ ajratgan. OTB O‘zbekiston Hukumati va boshqa manfaatdor tomonlar bilan mamlakatning yashil iqtisodiyotga o‘tish jarayonida yordam berish, xususiy sektor rivojlanishi va raqobatbardoshligini qo‘llab-quvvatlash hamda inson kapitaliga investitsiyalarni rag‘batlantirish maqsadida yaqindan hamkorlik qiladi.
OTB Osiyo va Tinch okeani mintaqasida inklyuziv va barqaror o‘sishni qo‘llab-quvvatlaydigan yetakchi ko‘p tomonlama rivojlanish bankidir. OTB murakkab muammolarni birgalikda hal qilish uchun o‘z a’zolari va hamkorlari bilan ishlar ekan, odamlar hayotini o‘zgartirish, sifatli infratuzilmani barpo etish va sayyoramizni himoya qilish uchun innovatsion moliyaviy vositalar va strategik hamkorliklardan foydalanadi.
