O‘zbekiston & Germaniya: epidemiologik vaziyat va odamlar dunyoqarashida qanday farq bor — mutaxassis baho berdi
Professor, tibbiyot fanlari doktori, taniqli infeksionist, mikrobiolog Verner Ber bir oydan beri Koronavirusga qarshi kurashish shtabida konsultant sifatida bo‘lib turibdi. SSV matbuot kotibi olim bilan suhbat uyushtirdi:
- Bir oy davomida yurtimizdagi epidemiologik vaziyatni o‘rganish imkoningiz bo‘ldi. Uni qanday baholaysiz?
- Aslida bu mening O‘zbekistonga ikkinchi tashrifim. Birinchi marta may oyida kelgandim. O‘sha paytdagi va hozirgi vaziyatni taqqoslasam, ayni vaqtda yangi kasallanish holatlari sezilarli darajada oshdi.
Hozir O‘zbekistonda kuzatayotganlarim Germaniyada 1-2 oy avval bo‘lgan vaziyatga o‘xshaydi. Ushbu taqqoslash imkoniyatining o‘ziga xos afzalliklari va ijobiy tomonlari mavjud. Chunki men Germaniyada to‘plagan tajribamni O‘zbekistonda qo‘llash imkoniyatiga ega bo‘lganimdan mamnunman.
Germaniya va O‘zbekistonda odamlarning epidemiologik vaziyatni qabul qilishida farq kuzatdingizmi?
- Yo‘q, aksincha. Odamlarning xatti-harakatlarini tahlil qilsak, ular Germaniyadagiga juda o‘xshash. Ya’ni, dastlab odamlar virus xavfini jiddiy qabul qilishdi, tartib-intizomga qat’iy rioya etishdi. Ammo vaqt o‘tishi bilan fuqarolar bo‘shashdilar: oralaridagi ijtimoiy masofani saqlamay, niqoblarni to‘g‘ri taqmay qo‘yishdi.
Men hozir xuddi shunga o‘xshash vaziyatni bu yerda ham kuzatmoqdaman. Kuni kecha mehmonxona derazasidan shunday holatni kuzatdim: favvora yonida yoshlar niqobni to‘g‘ri taqmagan va ijtimoiy masofani saqlamagan holda dam olishayapti.
Afsuski, Germaniyada odamlar tartib-intizomga rioya qilishni unutgan o‘sha paytda virusning qayd etilishi ancha o‘sdi. Vaziyatdan foydalanib, yurtingiz aholisini ogohlikka chaqirmoqchiman.
Agar orangizda shunday befarq odamlar ko‘payadigan bo‘lsa, 1-2 oy ichida kasallikni yangi yuqtirganlar soni keskin ortishi mumkin. Shuning uchun ham ehtiyot choralariga qat’iy amal qilishlari zarurligini aytmoqchiman. Vaziyatni nazorat qilish odamlarning o‘z qo‘llarida.
