Ozodbek NAZARBEKOV: Kattaqo‘rg‘onda Xalq havaskorlik ansambllari markazini qayta ta’mirlab, ko‘rkam bino barpo etamiz

Qalbida san’atga muhabbati bor yoshlarni ko‘rsak dilimiz yayraydi. Ularning yonib turgan ko‘zlarida kelajakka ishonch, Vatanga muhabbat tuyg‘ulari aks etadi. Kattaqo‘rg‘on shahar xalq havaskorlik ansambllari markazi yoshlari bilan bo‘lgan uchrashuvimizdan qalblarimiz junbishga keldi.

Mo‘’jazgina, hech qanday sharoit va imkoniyatlarga ega bo‘lmagan, kichikkina xonalarda katta iqtidor egalari ulg‘ayayotganini ko‘rib, hayajonda, hayratda edik. “Izlagan imkon topar, izlamagan bahona”, degan xalq maqoli yodimizga tushdi.

Markaz yoshlari bilan suhbatlashish asnosida ularning ertangi kun rejalari bilan ham o‘rtoqlashdik. Yaqin kelajakda o‘zbek san’ati osmonida yangi yulduzlar porlashiga amin bo‘ldik. Kelajakdagi ana shu yangi yulduzlar uchun Kattaqo‘rg‘on shahar xalq havaskorlik ansambllari markazini qayta ta’mirlab, zamonaviy va ko‘rkam bino barpo etishni ko‘nglimizga tugdik.