Past Darg‘omdagi ohak sexida gazdan noqonuniy foydalanish oqibatida 4,3 mlrd. so‘mlik zarar yetkazilgani aniqlandi
Samarqand viloyati prokuraturasi organlari tomonidan Past Darg‘om tumani “Kamolot” mahallasi hududida faoliyat yurituvchi “D.G‘.S” MChJ mansabdor shaxslari va boshqalar “Pastdarg‘omtumangaz” gaz ta’minoti bo‘limining ruxsatisiz, shartnoma tuzmasdan, mavjud qoidalarga zid ravishda ohak ishlab chiqarish sexini tashkil etib, tabiiy gazdan noqonuniy ravishda foydalanib kelayotganligi aniqlangan.
Jamiyat tomonidan o‘zboshimchalik bilan tabiiy gaz tarmog‘iga ulanib olib, noqonuniy ravishda foydalanib kelganligi oqibatida 4,3 mlrd. so‘m zarar yetkazilgan.
Mazkur holat yuzasidan Samarqand viloyati prokuraturasi tomonidan “D.G‘.S” MChJ mansabdor shaxslari va boshqalarga nisbatan Jinoyat kodeksining 169-moddasi 4-qismi “a” bandi bilan jinoyat ishi qo‘zg‘atilib, dastlabki tergov harakatlariga kirishilgan.
