Pora olgan Bulung‘ur va Samarqand tumanining ikki soliqchisi 5 yilga ozodlikdan mahrum qilindi
Samarqand tumani soliq inspeksiyasi xodimi Bulung‘ur tumanida tadbirkorlik bilan shug‘ullanuvchi fuqaroga soliqlardan asossiz hisoblangan qarzdorlikni kamaytirishda yordam berishini aytgan. U ushbu xizmati evaziga 1000 AQSh dollari talab qilgan.
Aniqlanishicha, soliq inspeksiyasi xodimi tadbirkorning qariyb 300 mln so‘mlik soliq va penya qarzdorligini kamaytirishda Bulung‘ur tumani soliq inspeksiyasida kameral soliq tekshiruvlari shu’basi boshlig‘ini sherik qilgan.
Soliqchi Samarqand shahridagi kafelardan birida tadbirkordan kelishilgan pulning 500 dollarini olayotganida ashyoviy dalillar bilan qo‘lga olingan.
Jinoyat ishlari bo‘yicha Samarqand shahar sudida o‘tkazilgan sud majlisida soliq xodimlari Jinoyat kodeksining 210-moddasi (pora olish) 2-qismi "v" bandi bilan aybdor deb topilib, 5 yilga ozodlikdan mahrum qilindi.
