Samarqandda davlat xizmatlari ko‘rsatish bo‘yicha 6 oyda 5 mingdan ziyod qonun buzilish holatlari aniqlangan
Bu haqda “ZOOM” platformasi orqali davlat xizmatlari agentligi Samarqand viloyati boshqarmasi boshlig‘i Maqsud Qurbonov ishtirokidagi matbuot anjumanida aytildi.
Joriy yilning birinchi yarim yilligida o‘tkazilgan tekshirish va monitoringlar natijasida davlat xizmatlari ko‘rsatish sohasida 5 ming 99 ta qonun buzilishi holatlariga yo‘l qo‘yilganligi aniqlangan.
Jumladan, 4 663 holatda davlat xizmatlari ko‘rsatish muddatlari buzilgan. 29 holatda to‘g‘ridan-to‘g‘ri davlat xizmatlari ko‘rsatilgan bo‘lsa, 91 holatda ortiqcha hujjat talab qilib olingan. 203 holatda murojaatlarni asossiz rad etish va 113 holatda boshqa qonun buzilishlariga yo‘l qo‘yilgan.
- Davlat kadastrlari palatasi tuman, shahar filiallari tomonidan eng ko‘p, ya’ni 1364 qonun buzilish holati aniqlangan, - deydi M.Qurbonov. - “Samarqand suv ta’minoti” MChJ va uning tuman, shahar filiallari tomonidan esa 913 ta qonun buzilishlariga yo‘l qo‘yilgan. Ushbu holatlar bo‘yicha vakolatli idoralarning rahbarlari nomiga 27 ta taqdimnoma va 315 ta ogohlantirish xatlari kiritildi. Shuningdek, 143 nafar aybdor shaxsga nisbatan ma’muriy huquqbuzarlik to‘g‘risida bayonnomalar rasmiylashtirilib, 82 nafarining intizomiy javobgarlikka tortilishi ta’minlandi. Shundan 9 nafar xodim bilan tuzilgan mehnat shartnomasi bekor qilindi.
Ma’lumotlarga ko‘ra, viloyatda shu yilning o‘tgan 6 oyi davomida shahar va tumanlardagi markazlar tomonidan 445 ming 832 ta davlat xizmatlari ko‘rsatilgan. 2020 yilning birinchi yarim yilligida esa 262 ming 594 ta davlat xizmatlari ko‘rsatilgan.
FHDYo bo‘limlari tomonidan 47 ming 588 ta tug‘ilganlik haqidagi guvohnoma rasmiylashtirilib, 8 ming 650 holatda o‘lim dalolalatnoma yozuvlari qayd etilgan. Shuningdek, 13 ming 318 ta nikoh qayd etilgan bo‘lsa, 2 ming 58 ta nikohdan ajralganlik haqidagi dalolatnoma yozuvlari rasmiylashtirilgan. Achinarisi, ajrim holatlari 2020 yilning mos davriga nisbatan 756 taga ko‘paygan.
Mansur Hasanov.
