Samarqandning iqtisodiy o‘sish nuqtalari belgilandi: 4-o‘sish nuqtasi

“Bu yo‘nalish sifatida meva-sabzavot va chorvachilik mahsulotlarini qayta ishlashni rivojlantirish belgilandi, - deydi Dilshod Shakarboyev. - Hozirda viloyatimizda meva-sabzavot mahsulotlarining atigi 12 foizi qayta ishlanadi”.

Ichki iste’mol va eksportdan tashqari viloyatda jami 1,8 million tonna  mahsulot qoladi. Ammo bugun qayta ishlash korxonalarining 52 foiz uskunasi eskirgan. Korxonalarga innovatsion, energiya tejamkor va dunyo standartiga mos texnologiyalarni joriy qilish lozim bo‘ladi. Shu bois, viloyatning 5 ta tumanida meva-sabzavotni chuqur qayta ishlash bo‘yicha 8 ta klaster tashkil etiladi. Umumiy qiymati 134,9 milliard so‘mlik 11 ta loyiha amalga oshiriladi. Natijada, qo‘shimcha 85,6 ming tonna mahsulot qayta ishlanadi, 950 dan ortiq doimiy ish o‘rni yaratiladi.

Bundan tashqari, viloyatimizda 1600 dan ortiq madaniy meros ob’yekti bor. Sayyohlarning asosiy qismi madaniy meros ob’yektlarini ko‘rishga keladi. Biroq bor-yo‘g‘i 30 ga yaqin madaniy meros ob’yekti turistik yo‘nalishga kiritilgan.

Xorijiy sayyohlarning viloyatimizda qolish muddati o‘rtacha 1,2 koeffitsiyentni tashkil etadi. Chunki joylashtirish vositalari va turistik ob’yektlar soni yetarli emas.

Viloyatimizning turizm salohiyati va imkoniyatlarini inobatga olib, xorijiy va mahalliy sayyohlar oqimini ko‘paytirish uchun qo‘shimcha xizmatlar yo‘lga qo‘yiladi. 2021 yilda bir vaqtning o‘zida 18,6 ming kishiga xizmat ko‘rsatish imkoniyati yaratiladi. Xususan, Samarqand tumanidagi Konigil turizm qishlog‘ida etnoturizm, Nurobod, Payariq tumanlarida ziyorat va ekstremal, Urgut va Qo‘shrabot tumanlarida ekoturizm rivojlantiriladi.

Buning uchun 2021-2022 yillarda qiymati 4,1 trillion so‘mlik 367 ta, shundan 105 ta yangi mehmonxona, 200 ta oilaviy mehmon uyi, 33 ta dam olish maskani, 3 ta savdo-ko‘ngilochar markaz va 26 ta boshqa turizm yo‘nalishidagi loyihalar amalga oshiriladi. Natijada, turistik xizmatlarning sohadagi ulushi 1,5 barobarga oshadi va 8150 ta yangi ish o‘rni yaratiladi.