Android qurilmalar uchun Zarnews.uz mobil ilovasi. Yuklab olish x

TATU Samarqand filiali talabalari orasida koronavirus tarqalgani rostmi? Vazirlik izoh berdi

Telegramdagi ayrim kanallarda ba’zi oliy ta’lim muassasalari (O‘zbekiston Milliy universiteti, Toshkent davlat sharqshunoslik, Farg‘ona politexnika instituti, TATU Samarqand filiali) talabalari orasida koronavirus aniqlangani hamda fakultet va yotoqxona qavatlari dezinfeksiya uchun yopilgani to‘g‘risida xabarlar tarqalmoqda.

Oliy va o‘rta maxsus ta’lim vazirligi axborot xizmati bu kabi xabarlar asossiz ekanini ma’lum qildi.

Qayd etilishicha, xabarda ko‘rsatilgan oliy ta’lim muassasalari talabalari orasida ayni kunlarda koronavirus infeksiyasi aniqlanmagan va birorta ham talabalar turar joyi binosi yopilmagan.

"Haqiqatan ham, axborotni birinchi bo‘lib ommaga tezkor yetkazish davr talabi. Lekin har qanday xabarni emas, balki tekshirilgan, asoslangan ma’lumotlarni e’lon qilish – eng muhim jihat va jurnalistikaning “oltin qoida”si ekanini eslatib o‘tamiz!

Shuning uchun xabarlarni tarqatishdan avval biroz sabr qilib, aniqlik kiritib, keyin e’lon qilish, juda ham zarur bo‘lmasa, bu turdagi sovuq xabarlarni ommalashtirishdan tiyilish maqsadga muvofiq, deb hisoblaymiz.

Chunki, noto‘g‘ri talqin qilingan, hali to‘liq aniqlik kiritilmagan, shoshilinch tarzda tarqatilgan kichik bir xabar minglab yoki millionlab insonlarda xavotir uyg‘otishi tabiiy. Nafaqat xavotir uyg‘otadi, balki shu kasallik o‘zida bor yoki yo‘qligi haqida shubha-gumonga borib, qo‘shimcha kasalliklar orttirib olishiga sababchi bo‘lishi mumkin.

Shu bilan birga asossiz va yolg‘on axborotni tarqatganlik uchun O‘zbekiston Respublikasi qonunlarida ma’muriy va jinoiy javobgarlik normalari belgilanganini unutmang!

Qolaversa, Oliy va o‘rta maxsus ta’lim vazirligi hamda oliy ta’lim muassasalari bu kabi (kasallik aniqlanishi) holatlar jiddiy tus olib, keng tarqala boshlasa, ularni yashirishdan manfaatdor emas", deyilgan vazirlik xabarida.v