To‘rt farzand bilan qolgan ona aliment pulini undirolmayapti
«Payariq tumani MIB xodimlarining harakatsizligi, o‘z xizmat vazifalariga yuzaki yondashayotgani tufayli bormagan idoram qolmadi. Turmush o‘rtog‘im to‘rt nafar farzandidan hol so‘ramagani uchun ham aliment undirish bo‘yicha murojaat qildim. Mana, shu yilning yanvar oyidan boshlab ota uyimda yashayapman. MIBga qatnayverib, oxiri 1 million 400 ming so‘mni zo‘rg‘a oldik. Bir necha marta prokuraturaga va boshqa idoralarga alimentni o‘z vaqtida undirib berish bo‘yicha xat yozdim. Jumladan, O‘zbekiston Respublikasi Bosh prokuraturasi huzuridagi Majburiy ijro byurosi tomonidan yaqinda shunday maktub oldim.
«Sizning sud qarori ijrosi ta’minlanmayotgani yuzasidan yo‘llagan murojaatingiz Byuroning fuqarolik ishlari bo‘yicha sudlar hujjatlarini ijro etish bo‘limi tomonidan ko‘rib chiqildi. Aniqlanishicha, fuqarolik ishlari bo‘yicha Samarqand viloyati Payariq tumanlararo sudining 2019 yil 3 iyuldagi qarzdor B.To‘rayevdan sizning foydangizga to‘rt nafar voyaga yetmagan farzandlaringiz ta’minoti uchun oylik ish haqi va boshqa daromadlarining ½ (ikkidan bir) qismi miqdorida aliment undirish to‘g‘risidagi ijro hujjati bo‘yicha Byuroning Payariq tuman bo‘limida ijro ishi yuritilgan.
Mazkur ijro ishi yuzasidan qarzdorning mulkiy holatini aniqlash maqsadida vakolatli organlarga so‘rovnomalar yuborilgan bo‘lib, olingan javob xatlariga ko‘ra, unga tegishli undiruv qaratilishi mumkin bo‘lgan mol-mulklar mavjud emasligi aniqlangan hamda 2019 yilning 14 oktyabrida qarzdorning O‘zbekiston Respublikasi hududidan chetga chiqish huquqlari vaqtincha cheklangan.
Olib borilgan ijro harakatlari davomida qarzdordan joriy yilning avgust oyiga qadar jami 7 million so‘m miqdorida aliment pullari foydangizga undirib berilgani ma’lum bo‘ldi».
Ushbu xat kelgach, yugur-yugurlardan so‘nggina yana 3 milliondan ortiqroq pulni oldim. Majburiy ijro byurosi esa 7 million pul undirilgan, deb yozmoqda. To‘rt bolamni boqish, kiyintirish, biriga doimiy ravishda dori-darmonlar olishim kerak. Shuning uchun pulga muhtojligimizdan uni talab qilishga majbur bo‘lyapman. Majburiy ijro byurosi tuman bo‘limiga bormagan kunim yo‘q. Har safar quruq va’dalar, ba’zida dakki eshitib kelaman.
Bilishimcha, aliment to‘lamagan otalar javobgarlikka tortilmoqda. Ammo farzandlarimning otasiga bunday chora qo‘llanilgani yo‘q. Ehtimol, shuning uchun undiruv qiyin kechayotgandir».
Dilshoda TO‘RAYeVA,
Payariq tumani, Xo‘jaobod mahallasi.
